Израиль жаңа әскери барлау спутнигін ұшырды
АСТАНА.KAZINFORM — Жер серігін ұшыру Израильдің ұлттық қауіпсіздігін нығайту және бақылау мүмкіндіктерін кеңейту стратегиясының маңызды элементіне айналды, деп хабарлайды Kazinform агенттігінің меншікті тілшісі.
Израиль қорғаныс министрлігі сейсенбі күні жаңа «Офек-19» радиолокациялық бақылау спутнигінің орбитаға сәтті ұшырылғанын хабарлады.
Жер серігі Израиль қорғаныс күштері мен Israel Aerospace Industries (IAI) бірлесуімен ұшырылды. Құрылғы кез келген ауа райы жағдайында тәулік бойы бақылауға мүмкіндік беретін синтетикалық апертуралы радиолокациялық жүйемен жабдықталған.
Орбитаға шыққаннан кейін спутник деректер беруді бастады және пайдалануға енгізілмес бұрын бірқатар сынақтан өтіп жатыр. Сынақтар аяқталғаннан кейін спутникті басқару Израиль армиясының визуалды барлауға жауапты 9900 бөлімшесіне беріледі.
🇮🇱 BREAKING: Israel has launched the Ofek 19 spy satellite, marking a historic leap in national defense and intelligence. With this launch, Israel joins an elite club of just 3–5 nations that can independently build, launch, and operate advanced reconnaissance satellites.
— Israel War Room (@IsraelWarRoom) September 3, 2025
Ofek… pic.twitter.com/Ak9oE3kG8E
Израиль қорғаныс министрлігінің мәліметінше, «Офек-19» сипаттамалары жақсартылған және армияның мүддесі үшін барлау мақсатында жасалған.
Ұшыру салтанатына президент Исаак Герцог, қорғаныс министрі Исраэл Кац, қорғаныс министрлігінің бас директоры Амир Барам және Israel Aerospace Industries бас директоры Боаз Леви қатысты.
— Біз жай ғана стартаптар мемлекеті емеспіз, біз ғарыштық державамыз. Израиль ғарышта болуы керек, өйткені бұл жерде біздің ең маңызды стратегиялық мүмкіндіктеріміз бар, — деді Герцог.
אנחנו לא רק סטארט-אפ ניישן - אנחנו גם ספייס ניישן.
— יצחק הרצוג Isaac Herzog (@Isaac_Herzog) September 3, 2025
אמש התרגשתי לצפות מקרוב בשיגור הלוויין ״אופק 19״ ממרכז הבקרה, יחד עם בכירי מערכת הביטחון והתעשייה האווירית. זהו רגע שמסכם שנים של עבודה יוצאת דופן - מקצועית, ממוקדת ומעוררת השראה.
ישראל חייבת להיות בחלל - שם נמצא עתיד האנושות.… pic.twitter.com/xP1DdUvyfK
Кац бұл ұшыруды «ұлттық мақтаныш сәті» деп атап, жаңа жер серігі мемлекет күшінің қосымша элементі болатынын және Израиль қорғаныс өнеркәсібінің даму деңгейін көрсететінін атап өтті.
Барамның айтуынша, «Офек-19» ұлттық қорғаныс үшін айтарлықтай «күш мультипликаторы» болады және Израиль алдағы онжылдықта спутниктік шоқжұлдыз құруға миллиардтаған шекель инвестициялауға ниетті.
Израиль әскерилері жаңа құрылғылар бүкіл Таяу Шығыстағы жағдайды тұрақты бақылауға мүмкіндік беретінін атап өтті. Газа секторында жалғасып жатқан қақтығыстар мен көршілес елдердегі қарулы топтарға қарсы операциялар аясында, ұлттық қауіпсіздік үшін ғарыштық технологиялардың маңызы артып келеді.
Офек бағдарламасын Израиль 1988 жылдан бері жүзеге асырып келеді. Осы уақыт ішінде ел бақылау спутниктерінің тұтас отбасын құрды, бұл оны ғарыштан жоғары дәлдіктегі барлау мүмкіндіктері бар санаулы елдердің біріне айналдырды.
Айта кетелік Израиль Батыс жағалаудағы даулы E1 құрылысының жобасын мақұлдады.
