Израильдің Газадағы әуе соққысынан 5 журналист қаза тапты
АСТАНА. KAZINFORM – Израильдің Газа секторының оңтүстігіндегі Хан-Юнис қаласында орналасқан Насер ауруханасы маңына жасаған әуе соққысы салдарынан кемінде 20 адам қаза тапты. Олардың арасында халықаралық БАҚ-та қызмет атқарған 5 журналист бар, деп хабарлайды BBC.
Қаза тапқандардың қатарында Reuters агенттігінің операторы Хусам әл-Масри, Associated Press-тің фриланс-журналисі Марьям Дагга, сондай-ақ Al Jazeera-да жұмыс істеген Мухаммед Саламе, фотограф Муатх Абу Таха және Ахмад Абу Азиз бар.
AP редакциясы 33 жастағы Марьям Дагганың өліміне байланысты ұжымның қаралы күйде екенін білдірді. NBC арнасы бастапқы мәліметтерге қарамастан, Муатх Абу Таханың өз қызметкері болмағанын нақтылады.
Газа азаматтық қорғаныс қызметінің хабарлауынша, алғашқы соққы кезінде бірнеше адам көз жұмса, екінші соққы құтқарушылар оқиға орнына жеткен кезде жасалған.
Израиль армиясы (ЦАХАЛ) шабуылды растады. Әскерилердің мәлімдемесінде: «ЦАХАЛ журналистерді нысанаға алмайды және бейбіт тұрғындарға келетін залалды барынша азайтуға тырысады. Әскерилердің қауіпсіздігін қамтамасыз ету үшін осындай шаралар қабылданды», – делінген.
Оқиға орнындағы видеокадрларда аурухана кіреберісінде дәрігерлердің қанға боялған киімді көрсетіп тұрған сәтінде жаңа жарылыс болғаны көрінеді. Адамдар дүрбелеңге түсіп, қаша бастайды, әйнектер сынғаны аңғарылады. Басқа бейнелерде аурухана ғимаратынан қою түтін көтеріліп жатқаны, сыртта адамдардың айқайлап, жүгіріп жүргені байқалады.
Бұл оқиға Израильдің екі апта бұрын Газа қаласындағы «Әш-Шифа» ауруханасы маңында 6 журналист қаза тапқан соққысынан кейін болып отыр. Сол кезде қаза тапқандардың төртеуі Al Jazeera қызметкерлері еді. Израиль тарапы олардың бірі – тілші Анас аш-Шарифті ХАМАС тобы жетекшілерінің бірі деп атаған, бірақ Журналистердің құқын қорғау комитеті (CPJ) бұл айыптауларды дәлелсіз деп мәлімдеді.
БҰҰ Адам құқықтары жөніндегі Жоғарғы комиссары басқармасы да шабуылды айыптап, оны халықаралық құқықтың өрескел бұзылуы деп атады.
Соңғы оқиғалардан кейін 2023 жылғы қазан айында басталған соғыстан бері Газада қаза тапқан журналистердің саны 200-ге жуықтады.
