«Jibek Joly» телеарнасына – 2 жыл

АСТАНА. KAZINFORM – 2022 жылдың 1 қыркүйегінде эфирге шыққан «Jibek Joly» телеарнасы аз уақыттың ішінде көш бастаған отандық арналардың қатарынан табылды.

«Jibek Joly» ұжымы өзінің алғашқы телемаусымында әлемдік саяси және діни көшбасшылардың сапарынан ондаған тікелей эфир таратты. LIVE режимінде шет мемлекеттер президенттерінің Қазақстанға мемлекеттік сапарлары мен маңызды халықаралық форумдар көрсетіліп, сайлау науқанына байланысты телемарафондар өткізілді.

Сондай-ақ 2023 жылдың көктемінде робот камералы жаңа технологиялық жаңалықтар студиясы және Мәжіліс пен Үкіметтегі мобильді студиялардың тікелей эфирдегі жұмысы іске қосылды.

Биыл Париж Олимпиадасынан тікелей эфир таратып, көрермендерге сапалы дүние ұсына білді. Бұл — телеарна тарихындағы тұңғыш ірі спорттық дода екенін атап өткен жөн.

«Ұжымда тәжірибелі әрі білікті мамандар қызмет еді. Сәйкесінше, көрермендерге сапалы дүние ұсынылып келеді. Алдағы уақытта көрермендерге тың жобалар жол тартатын болады», – деді «Jibek Joly» телеарнасының директоры Еркежан Күнтуғанқызы.

Айта кетейік, прайм-тайм хабар таратудың бірінші жылында «Jibek Joly» танымал медиа-тұлғалар – Нұрлан Қоянбаев, Ләйлә Сұлтанқызы, Санди Сұлтан, Бейбіт Әлібеков, Майя Бекбаева, имам Нұрлан Байжігітұлы қатысқан 16 жаңа тележобамен нығая түскен болатын.

Қазақстандық көрермен үшін жетістік драйверлері – арнаның танымал әлеуметтік жобалары: «Шетелдегі қазақ балалары», Ләйлә Сұлтанқызының «Ана болғым келеді» атты авторлық бағдарламасы болды.

Естеріңізге салсақ,«Jibek Joly» телеарнасы Қазақстан Республикасы Президентінің телерадиокешені медиа-компанияның құрамында.