Jibek Joly телеарнасы сайлау күнінде арнайы эфир шығарады

АСТАНА. ҚазАқпарат – 20 қараша күні Jibek Joly телеарнасы көрермендері үшін арнайы эфир шығарады, деп хабарлайды ҚазАқпарат тілшісі.

Ұлттық телеарна директоры Константин Харламовтың айтуынша, осы жексенбіде көрерменді талай тосынсый күтіп тұр.

«ҚР Президенті Телерадиокешені мен «ҚазАқпарат» агенттігіндегі әріптестермен бірлесе отырып, елдің әр түкпірінен және ондаған шет мемлекеттен тікелей эфирде 20 сағатқа жуық хабар таратамыз. Телекөрермендерге халықтың сайлауға қалай қатысып жатқаны туралы жедел деректер беріліп, сарапшылар мен саясаттанушылар телеарна студиясына қонаққа шақырылады. Тілшілеріміз орталық сайлау комиссиясының кеңсесінде, республика бойынша сайлау учаскелерінде жұмыс істейді. Көрерменнің сайлау күні туралы шынайы және толыққанды ақпарат алатынына кепілдік береміз. Қазақстандықтарды еліміз үшін маңызы зор тарихи күнді бізбен бірге өткізуге шақырамыз», - дейді Jibek Joly телеарнасының басшысы.

Осы жексенбіде арнаның тікелей эфирі таңертең сайлау учаскелерінің ашылуымен басталып, дүйсенбіге қараған түні exit-poll қорытындысының алдын ала мәліметтері жарияланғаннан кейін аяқталады.

«Халықтың теледидар экранының алдында 20 сағат қаққан қазықтай тапжылмай отыра алмайтынын түсінеміз. Сондықтан біздің тікелей эфирлерді қазақстандықтар үшін ақпаратты алуға ыңғайлы платформаларда қолжетімді етеміз. Атап айтқанда, әлеуметтік желілерде, мессенджерлерде, Youtube видеохостингісінде. Дәл қазір барлық әлеуметтік желідегі Jibek Joly телеарнасының ресми аккаунттарына жазылуға шақырамын. Осылайша, 20 қараша күні болатын маңызды жаңалықтарды өткізіп алмайсыздар», - дейді Константин Харламов.

Осы күні «ҚазАқпарат» ХАА редакциясы да телеарнадағы әріптестермен қоян-қолтық жұмыс істейді.

«20 қарашада агенттік тілшілері маңызды оқиғалардың ортасында жүреді. Inform.kz ресурсында әрбір оқырман соңғы және ең сенімді ақпаратты 5 тілде оқи алады. Бүгінде жұртшылықтың ақпаратты алу тәсілдері өзгергенін байқап отырмыз. Қазақстандықтар ресурсымыздың мобильді нұсқасын көбірек пайдаланады. Оқырмандарымызға сайлау туралы барлық материал агенттіктің әлеуметтік желілердегі және мессенджерлердегі аккаунттарында да қолжетімді болатындығын айтқым келеді. Бұдан бөлек, 20 қарашада біз Jibek Joly телеарнасындағы әріптестерімізді қолдап, жаңартылған ұлттық телеарнада тікелей эфирде көрсетілген эксклюзивті материалдарды бөлісетін боламыз», - дейді «ҚазАқпарат» ХАА бас редакторы Бибинор Танельбаева.

Фотограф: Диана Сагимбаева