Қ.Бозымбаев: 15 мың доллардың электромобилі шықса, міндетті түрде сатып аламын
«Tesla көлігін мініп көрген емеспін. Бірақ, мен білетін ақпарат шын болса, Элон Маск (Tesla электромобилін ойлап тапқан адам) 2020 жылға қарай бағасы 15 мың доллар тұратын бес адамдық көлік шығармақ екен. Ол көлікке бензин құю үшін 500 теңге, дәл сол сияқты көлікке 5000 теңге кететін болса, тұтынушы қай машинаны таңдайды деп ойлайсыздар? Сондықтан, осы көлік Қазақстанға қашан келер екен деп, тағатсыздана күтіп жүрмін»,-деді Қ.Бозымбаев.
Министрдің айтуынша, бүгінде Қазақстандағы Tesla өкілдерінің көлігі өте қымбат, шамамен 100 мың доллардан басталады.
«Жуырда, Tesla 35 мың доллар тұратын көлік ұсынды. Әрине, бұл да, халық үшін қолжетімсіз машина. Егер де электромобильдердің бағасы жанармаймен жүретін автокөліктің бағасымен теңессе, оның үстіне, оны жүргізу үшін 10 есе аз ақша жұмсалатын болса, халық осы көлікті таңдар еді. Электромобильдің бір проблемасы бар, ол көлікті тоқпен қуаттау керек. Қазақстан тоқты қайдан алады? Электр қуатының 70 пайызын көмір стансаларынан аламыз. Сондықтан, бүкіл әлем сияқты көмірді өртеудің жаңа технологияларына көшуіміз керек », - деп толықтырды Қ.Бозымбаев.
«Tesla көлігі сатылады деп естігенде, қарап көргім келді, бірақ, электромобиль сатылады деген анонстан кейін небары бір күн ішінде 350 мың адам көлік сатып алуға онлайн тапсырыс бергенін білдім. Менің білуімше, қазір әлем бойынша миллионнан астам адам осы көлікті аңсап жүр. Сондықтан, күте тұру керек. Бірақ, 15 мың доллардың электромобилі шыға қалғанда міндетті түрде сатып аламын. Сондықтан, 2020 жылға дейін күте тұрайық»,-деді Қ.Бозымбаев.