Қ.Көшербаев жасөспірімдер арасында өткен қысқы олимпиаданың қола жүлдегері Э.Тұрсынбаеваны құттықтады

Жеделхатта: «Айналайын Элизабет! Сені Лиллехамерде өтіп жатқан жасөспірімдер арасындағы қысқы олимпиада ойындарында қола жүлдегер атануыңмен жерлестеріңнің атынан шын жүректен құттықтаймын! Мәнерлеп сырғанаудан жасөспірімдер Олимпиадасында ел қоржынына жүлде салған алғашқы спортшысың. Бұл жетістігіңді мақтан тұтамыз. Алда да жарқын жеңістіктер тілеймін! Құрметпен Қызылорда облысының әкімі Қ.Көшербаев», делінген.
Әлеуметтік парақшада Элизабет әкесі Байтақ Тұрсынбаев аймақ басшысына алғысын жеткізді.
«Қызылорда облысының әкімі Қырымбек Көшербаевтың құттықтау жеделхатын алдық. Көңіліңіз үшін алғысымызды жеткіземіз. Сізге денсаулық тілейміз. Элизабет 2013 жылы сіздің қабылдауыңыздан кейін республикалық турнирлерде Қызылорда облысының тобында болуға шешім қабылдаған болатын. Сіздің қолдауыңыздың арқасында Элизабет әлем деңгейіндегі спортшылар қатарында жүр», - деп жазады Б.Тұрсынбаев.