Қ.Саудабаевтың Норвегия СІМ Мемлекеттік хатшысы Торгер Ларсенмен кездесуінде екі елдің жаппай қы­рып-жою қаруын таратпау саласындағы өзара ықпалдастықтың өзек­ті мәселелері талқыланды

 Сұхбаттастар екі елдің жаппай қы­рып-жою қаруын таратпау саласындағы өзара ықпалдастықтың өзек­ті мәселелерін екіжақты, сондай-ақ жаһандық деңгейде талқылады, деп жазады «Егемен Қазақстан» газеті.

Қ.Саудабаев: «Біздің мемлекеттеріміз қару таратпау және қарусыздану үдерістерінде ортақ көзқараста және тиісті халық­ара­лық үдерістердің белсенді қа­ты­сушылары болып табылады. Соң­ғы жылдары Қазақстан мен Норвегия саяси, сондай-ақ ғы­лыми-техникалық қарым-қаты­нас­тарын едәуір нығайтты. Осы ынтымақтастығымыз қару таратпау мен қарусызданудың жаһан­дық режімін нығайтуға лайықты үлес қосатынына сенімдімін», деді өз сөзінде.

Өз кезегінде Т.Ларсен: «Президент Назарбаевтың Семей ядролық полигонын жабу, қуат­ты ядролық арсеналдан бас тарту жөніндегі шешімдері мен Қа­зақстанның іс-қимылдары бүкіл әлемге дем берді және өзге елдер үшін болашаққа жол салды. Қазақстан мен біздің елімізді ядролық қарудан азат әлем құ­руға деген ортақ ұмтылыс біріктіреді және біз оны нақты істермен нығайтып келеміз», деді.

Соңғы жылдарда Қазақстан мен Норвегия осы тақырыпқа арналған бірқатар ірі халық­аралық іс-шаралар өткізуде, БҰҰ аясында өзара белсенді іс-қи­мылдар жасауда. Қазақстанның Ұлттық ядролық орталығы Гео­физикалық зерттеулер инсти­туты мен Ядролық сынақтарға жап­пай тыйым салу туралы шарт­тың (ЯСЖТШ) орындалуын бақылау аясында мәліметтер ор­талығы болып табылатын «NORSAR» норвег орталығы ара­сындағы ынтымақтастық та­бысты дамып келеді. 2010 жылы Алматыда ҚР ҰЯО ҒЗИ жа­ны­нан ЯСЖТШҰ қолдау жөнінде Халықаралық оқу орталығы ашыл­ды. Астанада өткен кешегі ғылыми-практикалық семинар да ядролық қауіпсіздік мәселеле­ріне арналды.

Сұхбаттастар сондай-ақ Қа­зақ­станда 27-29 тамыз күндері Қазақстан Парламенті, «Назарбаев орталығы» және Ядролық таратпау және қарусыздануды жақтайтын Парламентарийлер одағы бірлесіп ұйымдастыратын «Ядролық сынақтарға тыйым салудан ядролық қарудан азат әлемге» халықаралық конферен­ция­сына Норвегия Стортингі (Парламенті) уәкілетті өкіл­де­рі­нің қатысу мәселесі талқыланды.

Келіссөздер нәтижесі бойын­ша тараптар «Назарбаев орта­лығы» мен Норвегиядағы тиісті құрылымдар арасында қару таратпау саласындағы ынтымақ­тас­тықты жолға қою туралы уағдаластыққа қол жеткізді.