Қ.Тоқаев: ЕАЭО мен Жібек жолының экономикалық белдеуін ұштастыру өте тиімді әрі стратегиялық тұрғыда маңызды

МӘСКЕУ. ҚазАқпарат - РФ СІМ Дипломатиялық академиясының профессор-оқытушылық құрамы мен тыңдаушыларының алдында сөйлеген сөзінде Парламент Сенатының төрағасы Қасым-Жомарт Тоқаев стратегиялық міндеттерді осындай күрделі жағдайда орындау Қазақстанның халықаралық ынтымақтастық пен аймақтық интеграциялық процестерге одан да терең ұмтылысын қамтамасыз етуге бағытталған дипломатияны айтарлықтай жандандыруды талап етіп отырғанын атап өтті.

«Басымдық бағыт - Еуразиялық экономикалық одақтың үлкен әлеуетін іске асыру. Біз аталған интеграциялық бірлестік қатысушы елдерді олардың мемлекеттік егемендігін сақтай отырып, ынтымақтастықтың жаңа деңгейіне шығарып отыр деп санаймыз», - деді Қ.Тоқаев.

Сенат спикерінің сөзіне сүйенсек, одақтың болашағы зор. Оны ЕАЭО-мен әлемнің 40-тан астам елінің еркін сауда аймақтарын құруға қызығушылық танытып отырғаны дәлелдейді.

«Қазақстан Президентінің пікірінше, ЕАЭО-ны құру - қазіргі заманның жаһандық қыр көрсетулеріне, соның ішінде әлемдік экономикалық дағдарыс қаупіне берген дәл жауабы», - деп мәлім етті ол.

Онымен бірге ҚР Сенатының спикері Жібек жолы экономикалық белдеуінің қытайлық концепциясын атап өтті.

«Біз Ұлы Жібек жолының бойындағы экономикалық белдеудің қытайлықтар «и да, и лу» деп атайтын концепциясын да мойындап отырмыз, өйткені ашық теңізге шығатын жолы жоқ, бірақ Еуразия құрлығының орталығында тиімді геостратегиялық орын алып отырған әлемдегі ең ірі мемлекет - Қазақстан үшін бұл жобаның құрлықтың Батысы мен Шығысын, Солтүстігі мен Оңтүстігін қосатын транзиттік аумақ ретінде стратегиялық позицияларды нығайтуда үлкен маңызы бар», - деді Қ.Тоқаев.

«Екі мегажоба - ЕАЭО мен Жібек жолының экономикалық белдеуін ұштастыру өте тиімді әрі стратегиялық маңызды болып табылады», - деп атап өтті ол.

ҚР Сенат төрағасы аталған проблеманы табысты шешу жағдайында біздің елдеріміздің игілігі үшін көлемі бойынша теңдесі жоқ, мүмкіндіктері шексіз жалпы сауда-экономикалық кеңістік пайда болатынын атап өткен.

«Осындай экономикалық ынтымақтастықтың мысалы ретінде ұзақтығы 8 445 шақырым болған, соның ішінде Қазақстандағы учаскесі 2 787 шақырымды құрайтын салынып жатқан «Батыс Еуропа - Батыс Қытай» автомобиль дәлізін, сондай-ақ еуразиялық магистральді бағдарлар аясындағы теміржол желісін дамытуды атауға болады. 2020 жылға қарай «Батыс Еуропа - Батыс Қытай» дәлізі бойынша теміржол және автомобиль көліктерімен 330 миллионға жуық тонна жүк тасымалданады», - деді ол.

Қ.Тоқаев Қазақстан аумағы арқылы қысқа жолмен Қытайды Каспий теңізі мен Парсы шығанағының аймақтарымен қосатын жаңа теміржол желісінің кең экономикалық болашақты ашып отырғанын атап өтті.