Қ. Тыныбеков Жол полициясы комитеті төрағасының қызметіне тағайындалды

АСТАНА. Сәуірдің 4-і. ҚазАқпарат /Айдар Оспаналиев/ - Ішкі істер министрлігінің Жол полициясы комитеті төрағасының қызметіне полиция полковнигі Қайрат Тыныбеков тағайындалды.

Бұл туралы бүгін Ішкі істер министрлігінің Тіл саясаты және ақпарат департаменті бастығының орынбасары Ернұр Уәли мәлім етті, деп хабарлайды ҚазАқпарат.Оның деректеріне қарағанда, полковник Қ.Тыныбеков ішкі істер органдарындағы қызметін 1986 жылы жедел уәкілдіктен бастаған. Содан бері ол Аудандық ішкі істер басқармасы бастығының орынбасары, Әкімшілік полиция қызметінің бастығы, Алматы қалалық Ішкі істер басқармасы бастығының орынбасары, Ішкі істер министрлігі Қоғамдық қауіпсіздік департаментінің бастығы, Батыс Қазақстан облыстық Ішкі істер департаментінің бастығы қызметтерін атқарған. «Соңғы 4 жылда ол Көліктегі Батыс ішкі істер департаментін басқарды. Көріп отырғандарыңыздай, бұл азаматтың ішкі істер органдарындағы, оның ішінде басшылық қызметтегі тәжірибесі аз емес», - деді департамент бастығының орынбасары.