Кадеттер арасындағы әлем чемпионаты: Айару Қалысбек қола жүлдеге ие болды
АСТАНА. KAZINFORM — Польшаның Бельско-Бяла қаласында өтіп жатқан каратэден әлем чемпионатында Қазақстан қоржынына алғашқы жүлде түсті. Бұл туралы Қазақстан каратэ федерациясының баспасөз қызметі хабарлады.
Кадеттер санатында кумите бағдарламасы бойынша 61 келіге дейінгі салмақта отандасымыз Айару Қалысбек қола жүлде иеленді. Ол кіші финалда сербиялық Анастасия Рудинацты айқын басымдықпен ұтты. Есеп 5-2 болды.
Бұған дейін Айару Қалысбек топтық кезеңде Финляндия, Албания және Испания спортшысынан басым түскен болатын. Ал ширек финалда Жапония өкілі Кохару Сатоны 4-0 есебімен ұтты.
Кейін финалға берілер жолдаманы Михаэла Аркаленмен сарапқа салды. Тартысты жекпе-жекте 3-6 есебімен америкалық қарсыласы басым түсті.
Айта кетейік, финалдық бәсеке жалғасып жатыр. Алда жасөспірімдер санатында Ұлттық құрама спортшысы Сұңқар Қанибек алтын медаль үшін таласады. Қарсыласы — Броди Каллен (Шотландия).
Еске салайық, Шұғыла Өмірбек әлем чемпионатында тарихи медаль жеңіп алған болатын.
