Қаладан ауылға: БҚО-да жас дәрігерлерге жаңа баспана берілді
ОРАЛ. KAZINFORM — Казталов ауданының Жалпақтал ауылында «Қаладан — ауылға» бағдарламасы аясында қаладан көшіп келген медицина саласы мамандарына тұрғын үй кілттері табыс етілді.
с-шараға қатысқан Батыс Қазақстан облысы әкімінің орынбасары Тілепберген Каюповтың атап өткеніндей, Мемлекет басшысының ауылдарды дамыту жөніндегі тапсырмаларын жүзеге асыру барысында өңірде жұмыстар атқарылып жатыр.
— Өткен жылы облыс әкімі Нариман Төреғалиұлының бастамасымен «Қаладан — ауылға» жобасы іске қосылған болатын. Бағдарламаның негізгі мақсаты — қалада тұратын ауыл азаматтарын қайта оралту арқылы ауылдық елді мекендердің әлеуметтік-экономикалық әлеуетін арттыру, кадр тапшылығы мәселесін шешу. Аталған жоба аясында өткен жылы облыс бойынша 42 тұрғын үй берілсе, биылғы жылдың басынан бері 16 баспана сатып алынды. Бұл — ауылдағы инфрақұрылымды дамыту мен сапалы адам ресурстарын тартудағы жүйелі қадамдардың нақты нәтижесі. Алдағы уақытта бұл бағыттағы жұмыстар жалғасын табатын болады, — деді Т.Каюпов.
Жалпақталда баспаналы болғандар арасында Ақтөбе қаласындағы М.Оспанов атындағы медицина университетін тәмамдаған осы ауылдың тумасы, жалпы тәжірибелі дәрігер Асылзада Құмар, Қызылорда облысы, Байқоңыр қаласынан келген реаниматолог-анестезиолог Асылхан Шакизадаев бар. Сондай-ақ тараздық акушер-гинеколог Мөлдір Ибрагимова, Қостанай облысы, Денисов ауданынан келген жалпы тәжірибелі дәрігер Ерболат Босынбековке жаңа тұрғын үй берілді.
Жалпы, өткен жылы Казталов ауданына аталған бағдарлама аясында 19 отбасы, яғни 106 адам көшіп келген.
Еске сала кетейік, бұдан бұрын БҚО-да «Қаладан ауылға» пилоттық жобасы жүзеге асырылатынын жазған болатынбыз.
