Камбоджа ЕАЭО елдерімен еркін сауда аймағын құруға мүдделі
Бұл туралы ҚР СІМ баспасөз қызметінен хабарлады.
Кездесу барысында А.Мусинов 2017-2018 жылдарға арналған БҰҰ Қауіпсіздік Кеңесінің тұрақты емес мүшелігі лауазымына Қазақстанның кандидатурасын қолдауға қатысты ҚР Президенті Нұрсұлтан Назарбаевтың Камбоджа Премьер-министрі Хун Сенге хатын сұхбаттасушыға тапсырды.
Арнайы өкіл өңірлік және халықаралық тұрақтылық пен қауіпсіздікті нығайтудағы Қазақстанның үлесі туралы, оның ішінде ядролық қарусыздану және ядролық қаруды таратпау туралы, сондай-ақ көпжақты дипломатия саласындағы елдің белсенді қызметі туралы Камбоджа сыртқы саясат ведомствосының Мемлекеттік хатшысына ақпарат берді.
О. Боритх Ел Президентінің Арнайы өкілін жіберу Қазақстан ой-ниетінің байсалдылығы туралы куәландыратынын атап өтті және аталған хат жедел түрде ел басшылығына жеткізілетініне сендірді.
Тараптар Азиядағы өзара ықпалдастық және сенім шаралары жөніндегі кеңес (АӨСШК) шеңберіндегі ынтымақтастық туралы пікірлер алмасты, АӨСШК негізінде жаңа халықаралық ұйым құру туралы Қазақстанның бастамасын талқылады.
Камбоджалық тарап Еуразиялық экономикалық одақпен сауда-экономикалық ынтымақтастықты дамытуға және ЕАЭО елдерімен еркін сауда аймағын құруға мүдделілік білдірді.
Тараптар жоғары деңгейдегі сапарларды ұйымдастыру, сімаралық консультациялар тетігін құруға және өзара тиімді сауда-экономикалық ынтымақтастықты дамыту мақсатында негізге алынатын екіжақты құжаттарға қол қою мүмкіндігін қарауға келісті.
Кездесуде сондай-ақ Камбоджа басшылығының және компанияларының Астанадағы «ЭКСПО-2017» халықаралық мамандандырылған көрмесіне қатысу мәселесі талқыланды.