Камчаткада ұшақ апатынан қаза тапқандардың денеcін судан шығара бастады
КАМЧАТКА. ТАСС-ҚазАқпарат – Ресейде құтқарушылар Камчаткада Ан-26 ұшағының құлауынан қаза болғандардың денесін тапты, деп хабарлайды ҚазАқпарат ТАСС агенттігіне сілтеме жасап.
«Мәйіттер судан шығарылуда, дәл қазіргі уақытта. Олардың саны бойынша жағдай уақыт сайын өзгеріп жатыр», - деді аймақ басшысы Владимир Солодов.
Солодов оқиға орнында сот-медициналық сарапшылар жұмыс істеп жатқандығын қосып өтті. «Олар шешімдерді процедураларға байланысты қабылдайды. Ауа райы мүмкіндік тудырса, оқиға орнына Петропавлдан Тергеу комитеті тергеу басқармасының сот-медициналық сараптамасы ұшып шығады», - деді Солодов.
Өлкенің үкіметтік комиссиясы апат болған жерге Мәскеу комиссиясы өкілдері Петропавл-Камчатскийге келген кезде ұшып шығады. Мүрделерді тасымалдау бойынша жұмысты толық көлемде ұйымдастырамыз: қажеттілік туындаса, мүрделерді Петропавл немесе Паланаға жеткізу қолға алынады», - деді Солодов.
Еске сала кетейік, 6 шілдеде Ресейдің Камчатка өңірінде 28 адам мінген ұшақ апатқа ұшырап, жолаушылар түгел қаза тапты.
Қасым-Жомарт Тоқаев ұшақ апатына байланысты Владимир Путинге көңіл айтты.
