Қанат Бозымбаев Астана маңындағы ауылдық жерлерді су тасқынынан қорғау шараларын тексерді
АСТАНА. KAZINFORM – Вице-премьер Аршалы ауданындағы Жібек Жолы ауылында, Целиноград ауданындағы Тайтөбе, Талапкер ауылдарында және Ақмола облысының Қосшы қаласында болды.
Жұмыс сапары барысында Қанат Бозымбаев және облыс әкімі Марат Ахметжанов Есіл және Нұра өзендерінің сағасындағы бөгеттердің, су өткізу құрылыстарының, су тораптарының жай-күйін тексерді. Сондай-ақ, Астана контррегуляторы мен Жібек Жолы ауылының бойында Астанадан 500 м қашықтықта 6,5 км-ге созылған бөгеттің құрылысын тексерді.
Содан кейін вице-премьер Қосшы қаласының маңындағы Тайтөбе ауылындағы қорғаныс бөгеттерін тексерді. Іс жүзінде Тайтөбеде 7 мың адам тұрады. Мұндағы қорғаныс бөгеттері ауылды еріген дала суларынан қорғау үшін тұрғызылды.
Сондай-ақ, Қанат Бозымбаев Нұра-Есіл өзендеріндегі Преображен гидроторабының жай-күйімен және Талапкер ауылы арқылы өтетін су бұру каналының жағалауларын көтеру жұмыстарымен танысты.
Ақмола облысында барлығы 144 су тасқыны қаупі бар елді мекен бар. Әкімдіктің мәліметінше, алдын алу шаралары толығымен аяқталды.
Осылайша, Целиноград ауданында Есіл және Нұра өзендерінің қауіпті учаскелерін жағалауды нығайту және арнасын кеңейту жүргізілді. Көкшетау қаласындағы Қылшақты өзенінің бассейні бойынша түбін тереңдету жұмыстары жүргізілді.
Облыс әкімі Марат Ахметжановтың айтуынша, өңірде 107,4 шақырым су бұру каналдары, 38 шақырым өзен арналары тазартылды. Өзеннің су тасқыны қаупі бар учаскелері жағалауды нығайту және түбін тереңдету жүргізілді, ұзындығы 35 шақырымнан астам бөгеттер нығайтылды, 21 шақырымнан астам жаңа бөгеттер тұрғызылды және 336 су өткізу құрылыстары жабдықталды.
Жұмыс сапарының қорытындысы бойынша Қанат Бозымбаев су тасқыны кезеңінен өтуге қажетті техника мен жеке құрамды дайындауды тапсырды.
Қанат Бозымбаев Қарағанды облысының су тасқыны кезеңіне дайындығын тексерген болатын.
