Қаңтар айында мемлекеттік бюджетке 1,5 трлн теңге түсті

АСТАНА. ҚазАқпарат – ҚР Премьер-Министрінің орынбасары – Қаржы министрі Ерұлан Жамаубаев 2023 жылғы қаңтардағы мемлекеттік қаржының атқарылуын баяндады, деп хабарлайды ҚазАқпарат тілшісі.

Министрдің айтуынша, мемлекеттік бюджетке 1,5 трлн теңге шамасында кіріс түсті немесе жоспар 144%-ке орындалды.

«Одан бөлек, республикалық бюджетке 1,1 трлн теңге түсті немесе жоспар 139%-ке орындалды. Кірістер бойынша жоспар 310 млрд теңгеге, оның ішінде салықтар – 302 млрд теңгеге асыра орындалды», - деді Е. Жамаубаев Үкіметтің бүгінгі отырысында.

Салықтар бойынша асыра орындаудың негізгі сомасы корпоративтік табыс салығына, қосылған құн салығына және шикі мұнайға экспорттық кеден бажына тиесілі.

Корпоративтік табыс салығы бойынша жоспардың асыра орындалуына 382 ірі салық төлеуші бойынша мәлімделген аванстық төлемдердің былтырғы қаңтардан 48,8%-ке немесе 53 млрд теңгеге өсуі әсер еткен.

«Қосылған құн салығы бойынша жоспардың асыра орындалу факторлары: тауарларды, жұмыстарды және көрсетілетін қызметтерді сату айналымының өсуі; қосылған құн салығын төлеушілердің 18%-ке өсуі; өткен жылғы қаңтармен салыстырғанда үшінші елдерден импорт көлемінің 84%-ке өсуі», - деп түсіндірді Қаржы министрі.

Сонымен бірге, шикі мұнайға экспорттық кеден бажы бойынша жоспардың асыра орындалуы негізінен АҚШ долларына шаққанда теңге бағамының 6,6%-ке төмендеуіне де байланысты болды.

Айта кетейік, Қаңтар айында Қазақстан экономикасы 5,6% өсті.