Канвон Олимпиадасы несімен есте қалды
АСТАНА. KAZINFORM – Бүгін Оңтүстік Кореяның Канвон қаласында өтіп жатқан IV қысқы жасөспірімдер Олимпиадасыны мәресіне жетіп, тарих қойнауына жол тартты.
Бұл Олимпиада ойындары қазақ жанкүйерлері үшін тарихи алтын медаль жеңіп алған жарқын сәттерімен мәңгі есте қалмақ. Олай дейтініміз 2012 жылы Инсбрукте (Аустрия) өткен ойындарда, 2012 жылғы Инсбрук (Аустрия) Олимпиадасында және 2020 жылы Лозанна (Швейцария) Олимпиадасында қазақ елінің спортшылары жеңіс тұғырының ең биік сатысына көтеріліп, Әнұранымызды әуелете алмаған еді. Тіпті, Лозаннада бірде-бір жүлдеге қол жеткізе алмадық.
Енді сөзімізге дәлел болу үшін әр Олимпиадаға қысқаша жеке-жеке тағы бір тоқтала кетейік.
2012 жыл: Инсбрук (Аустрия) Олимпиадасы
Бұл Қазақстан құрамасының қысқы жасөспірімдер Олимпиадасына алғаш рет қатысуы болатын. Нәтижесінде спортшыларымыз Инсбрукте 1 күміс және 2 қола медальға қол жеткізді. Жалпы командалық есепте 23-орынға табан тіреген еді. Онда Галина Вишневская-Шепоренко спринтте күміс жүлде, сосын із кесу сайысында қола медальға қол жеткізді.
Ал Сергей Малышев классикалық жүріспен 10 шақырым жарыста мәре сызығын үшінші болып кесіп, қола жүлде алып қайтты.
2016 жыл: Лиллехаммер (Норвегия) Олимпиадасы
2016 жылы Лиллехаммерде жерлестеріміз Олимпиаданы 2 қола медальмен аяқтады. Нәтижесінде, жалпы командалық есепте 26-орынға табан тіреді.
Норвегия төрінде бір қола жүлдені биатлоншы Арина Пантова спринтте жеңіп алса, екінші жүлдені ел қоржынына Элизабет Тұрсынбаева мәнерлеп сырғанау спортынан салды.
2020 жыл: Лозанна (Швейцария) Олимпиадасы
Қазақ спортшылары үшінші рет өткен Лозанна ойындары қазақ спортшылары үшін ең сәтсіз болды. Ел намысын қорғауға барған 26 атлетіміздің бірде-бірі жеңіс тұғырынан көріне алмады.
2024 жыл: Канвон (Оңтүстік Корея) Олимпиадасы
Бүгін мәресіне жеткен Канвон-2024 жасөспірімдер арасындағы IV қысқы Олимпиада ойындары бізге тарихи жетістігімен мәңгі есімізде қалып отыр. Аталған додада Қазақстан жасөспірімдер құрамасы сапында 41 спортшы 5 спорт түрінен бақ сынап, 55 жүлде жиынтығын сарапқа салды.
Нәтижесінде 1 алтын, 2 қола медальмен жалпы командалық есепте 20-орынға қол жеткізді.
Тұңғыш алтын медалді шаңғымен тұғырдан секіруден Қазақстан командасының мүшесі Илья Мизерных жеңіп алса, қола медальдің бірін шорт-тректен 1 000 метр қашықтықта сынға түскен спортшыларымыз Полина Омельчук қанжығасына байлады. Ал екінші қола жүлдені Қазақстан қоржынына хоккейшілеріміз салды.
