Қапшағайда биыл жаңа жағажайлар ашылады
ҚОНАЕВ. KAZINFORM — Былтыр шомылу маусымында Қонаев қаласы мен Қапшағай су қоймасына 1,5 млн демалушы келген.
Қонаев қаласының әкімі Асхат Бердіханов кәсіпкерлермен кездесуінде қала маңындағы жағажайларға байланысты жоба-жоспарларымен бөлісті.
Оның айтуынша, 2024 жылы № 5 жағажай қолданысқа берілген. Қазіргі уақытта бұл маңда тағы 1 шақырым жағажайды абаттандырып жатыр.
Сондай-ақ құрылыс жұмыстары № 8 жағажайда да жүріп жатыр.
— Енді жуық арада № 6, 7-ші жағажайды абаттандырып, қолданысқа беру қажеттілігі туындап отыр. Себебі шомылу маусымында осы қалалық жағажайға келіп, демалатын адамдардың саны басқа орындармен салыстырғанда айтарлықтай көп. Жыл басында аумағы 7,5 гектар жағажай «Қонаев әлеуметтік-кәсіпкерлік корпорациясы» АҚ-ға 10 жылға уақытша пайдалануға берілді. Енді корпорация жағажайды жаңғыртуға белсене кіріспек ниетте, — деді Асхат Бердіханов.
Еске салайық, бұған дейін Қапшағайда төрт және бес жұлдызды бірнеше қонақүй салынатынын жазғанбыз.
