Қарағанды облысында электр желілерінің 70 пайызы тозған
Өңір басшысы Ермағанбет Бөлекпаев ӨКҚ брифингінде электр желілері қатты тозған және жеткізушілермен қиындықтар туындаған ең осал аудандар мен қалаларды атап өтті, деп хабарлайды Кazinform тілшісі.
РСК брифингінде Қарағанды облысының әкімі Ермағанбет Бөлекпаев өңірдегі электр желілерінің тозуына қатысты проблемаларға тоқталды. Оның айтуынша, облыстағы желілердің шамамен 70%-ы ескірген.
«Тозу деңгейі өте жоғары, шамамен 70%. Біздің облыста электр желілері шамамен 18 000 км. Өңірде 4 ірі электрмен жабдықтаушы ұйым жұмыс істейді. Олардың тарифтері ұлғайтылды. Бұл компанияларға электр желілерінің тозуын азайту және жаңарту бойынша барынша қарқынды жұмыс істеу міндеттері қойылды», - дейді облыс әкімі.
Өңір басшысы ең проблемалы ұйымдар мен аудандарға да тоқталды.
«КРЭК – Қарағанды өңірлік электр компаниясының жұмысы үлкен алаңдаушылық туғызды. Ол Теміртау қаласында орналасқан. Компания негізінен біздің үш ауданымызда жұмыс істейді: Қарқаралы, Нұра, Осакаров және Бұқар жырау ауданының бір бөлігі. Біз олармен үнемі байланыстамыз, бақылауда ұстап отырамыз. Аталған мекеменің жұмысына Қарқаралы ауданына сапарым кезінде көптеген шағым түсті. Жағдайдың ушыққаны сонша, тіпті Қарағайлыда электрик те болмаған», - дейді Ермағанбет Бөлекпаев.
Электриктер тапшылығының басты себебі – жалақының төмендігі. Осы мәселені ескере отырып, бұл сала қызметкерлерінің жалақысын айтарлықтай көтеру туралы шешім қабылданған. Электр қуатымен қамтамасыз ету саласында сондай-ақ материалдық-техникалық жабдықтау да жетілдіріле бастады. Өңір басшысының айтуынша, қазір оң динамика байқалады. Бірақ әлі де проблемалық кәсіпорындар бар.
«Бізде «Шет Энерго» кәсіпорны әлі де негізгі проблемалық мәселе болып қалып отыр. Аты шулы компания. Өкінішке қарай, ол соңғы 20 жыл ішінде электр желілерін жаңартуға мүлдем еш қаржы салмаған. Бұл тұрғыда көптеген сот процесі жүріп жатыр. Айыппұлдар да, өтемдік тарифтер де болды. Қазір монополияға қарсы комитет пен энергетика қадағалау департаменті бұл мәселемен айналысып жатыр. Бұл компанияға Шет ауданы мен Ақтоғай ауданының шамалы бөлігі қарасты. Біз бұл жағдаймен әрі қарай айналысатын боламыз», - деді Қарағанды облысының әкімі.
Еске сала кетейік, қыркүйектің соңында Қарағанды қаласы толықтай жарықсыз қалған. Кеншілер шаһарында электр қуатының өшуіне ЖЭО-3-те технологиялық ақау себеп болған.
