Қарағанды тұрғыны ұлтаралық араздықты қоздырды деген күдікпен қамауға алынды
ҚАРАҒАНДЫ. KAZINFORM — Қарағандыда әлеуметтік желідегі жарияланымнан кейін ұлтаралық араздықты қоздыру фактісі бойынша қылмыстық іс қозғалды. Күдікті деп танылған 22 жастағы қала тұрғыны ұсталып, сот шешімімен екі айға уақытша ұстау изоляторына қамалды.
Әлеуметтік желіде жарияланған бейне қоғам наразылығын тудырды. Тергеу деректеріне сүйенсек, онда қазақ ұлты мен мұсылмандарға қатысты қорлайтын және арандатушы сипаттағы сөздер айтылған. Бұл қоғамда үлкен резонанс туғызып, құқық қорғау органдарының назарын аудартты.
Қарағанды облыстық полиция департаментінің хабарлауынша, жарияланым әлеуметтік желіге мониторинг жасау барысында анықталған. Материалдар бірден процессуалдық шешім қабылдау үшін тиісті тергеу органдарына жіберілді. Аталған дерек бойынша ҚР Қылмыстық кодексінің 174-бабы 1-бөлігіне сәйкес қылмыстық іс қозғалды. Бұл бап — әлеуметтік, ұлттық, рулық, нәсілдік, тектік немесе діни алауыздықты қоздыру үшін жауапкершілікті көздейді.
— Тергеу барысында күдіктінің ел аумағынан тыс жерге шығуға дайындалып жатқаны белгілі болды. Осыған байланысты оны қамауға алу туралы өтініш беріліп, 22 шілдеде Қарағанды қаласының тергеу соты бұлтартпау шарасын санкциялады. Қазіргі таңда күдікті екі ай мерзімге қамауға алынды, — делінген ПД ресми хабарламасында.
Бұған дейін күдіктінің әлеуметтік желіде көпшіліктен кешірім сұраған видеосы тараған болатын. Алайда бұл әрекет тергеу органдарының шешіміне ықпал етпеді. Қазір іс аясында кешенді лингвистикалық және дінтану сараптамалары тағайындалды. Тергеу аяқталған соң, заңға сәйкес нақты процессуалдық шешім қабылданады.
Айта кету керек, Қылмыстық кодекстің 174-бабы бойынша 2 жылдан 7 жылға дейінгі мерзімге бас бостандығынан айыру жазасы қарастырылған. Сарапшылардың айтуынша, мұндай істер этносаралық тұрақтылық пен қоғамдық келісімге тікелей әсер ететіндіктен, аса мұқият қарауды талап етеді.
Қазіргі уақытта бұл жағдай құқық қорғау органдарының бақылауында. Полиция департаменті тергеу барысы туралы қоғамды уақтылы ақпараттандырып отыруға уәде берді.
Еске сала кетейік, былтыр Алматыда әлеуметтік желіде ұлтаралық араздықты қоздырған әйел адам ұсталған болатын.
