Қарағандыда 15-тегі қызды 38 жастағы еркекке тұрмысқа берген

ҚАРАҒАНДЫ. KAZINFORM — Қарағандылық полицейлер 15 жасар қызға зорлық жасаған 38 жастағы ер адамға қатысты қылмыстық іс қозғады.

Оқиға Қарағанды облысының Абай қаласында болды. Әлеуметтік желілерде 15 жастағы қыздың анасы мен өгей әкесі оны 38 жастағы еркекке күйеуге бергені туралы хабар пайда болды.

Полиция кәмелетке толмаған балаға зорлық-зомбылық жасаған ер адамды қамауға алды. Аталған факті бойынша қылмыстық іс қозғалды.

— 15 жастағы қызға қатысты қылмыс жасады деген күдікпен 38 жастағы ер адам ұсталып, уақытша ұстау изоляторына қамалды. Полицияға арыз 15 наурызда келіп түсті, содан кейін дереу қылмыстық іс қозғалды. Қазіргі уақытта тергеу шеңберінде оқиғаның барлық мән-жайын анықтауға бағытталған қажетті сот-сараптамалық жұмыстар жүргізілуде. Кәмелетке толмаған жәбірленушімен психологтар жұмыс істеуде, — деп хабарлайды Қарағанды облысы ПД баспасөз қызметі.

Аталған оқиғаға ҚР Оқу-ағарту министрлігі Балалардың құқықтарын қорғау комитеті де түсінік берді.

— Қазіргі таңда тергеу жүргізілуде, қылмыстық іс қозғалды. Қажетті сараптамалар тағайындалды. Қыз бала әкесімен бірге, оған барлық қажетті психологиялық көмек және заңгерлік қолдау көрсетіледі. Бала құқықтары жөніндегі өңірлік уәкіл үнемі баланың әкесімен байланыста, сондай-ақ өгей әкесі мен анасын қылмыстық жауапкершілікке тарту туралы талап қойылмақ. Балалардың құқықтарын қорғау комитеті жағдайды назарда ұстайды және баланың құқықтарын қорғау үшін барлық қажетті шараларды қабылдайды, — делінген Балалардың құқықтарын қорғау комитетінің ресми хабарламасында.

Қазір жәбірленуші баланың өгей әкесі мен анасын жауапкершілікке тарту мәселесі шешілуде.

Бұған дейін СҚО-да қызын зорлаған ер адамды өмір бойына бас бостандығынан айырылғаны туралы хабарлаған болатынбыз.