Қарағандыда балабақша есепшілері 15 жыл бойы өздеріне артық жалақы аударып келген

АСТАНА. KAZINFORM — Ұрланған ақшаның жалпы сомасы 300 миллион теңгеден асты, деп хабарлайды Қарағанды облысының прокуратурасының баспасөз қызметі.

Қарағанды облысының прокуратурасы «№ 33 мектеп-бөбекжай-бақша кешені» КММ-де бюджет заңнамасының сақталуына тексеру жүргізді.

— Тексеріс барысында аталған мекеменің екі есепшісінің 15 жыл бойы өздеріне белгіленген нормадан артық жалақыны заңсыз аударғандығы анықталды. Ұрлықтың сомасы 300 миллион теңгеден асты. Аталған факті бойынша сотқа дейінгі тергеу амалдары жүргізілуде, — делінген хабарламада.

Бұған дейін хабарланғандай, Қарағанды облысында кәсіпкерлерден бірнеше рет пара алған басқарма басшылары сотталды.