Қарағанды билігі «Қарағанды - Астана» әуе рейсін ашуды ұсынуда, бірақ Үкімет бұл идеяны әлі қолдаған жоқ
«Азаматтық авиация комитетінде бірнеше рет отырыс өткізілді. Өкінішке орай, комитет бізді қолдаған жоқ. Біз Астана - Қарағанды автокөлік жолын қайта құрылымдауға байланысты дәлелдер келтіріп, теміржолдың жолаушылар тасқынын тасымалдап үлгермейтінін айттық», - деді А. Санаубаров бүгін облыстық әкімдік баспасөз орталығында өткен брифингте.
Оның сөзіне қарағанда, бұл мәселе Үкімет деңгейінде де көтерілген.
«Бірақ бізді әзірге қолдаған жоқ. Қолдамауының себебі арақашықтықтың қысқалығы - 200 шақырым болуы», - деп атап айтты А. Санаубаров.
Ол билетінің құны 15 мың теңге тұратын коммерциялық әуе маршрутын жасау шамаланған деп жалғастырды.
Сонымен қатар басқарма басшысы аймақаралық ынтымақтастық шеңберінде «Қарағанды-Павлодар», «Қарағанды-Шымкент» бағытында қатынайтын жаңа әуе рейсін ашу жөнінде жұмыстар жүргізіліп жатқанын хабарлады.
Қазіргі уақытта Қарағандының «Сарыарқа» әуежайынан Мәскеу, Санкт-Петербор, Киев, Минскіге, ел ішінде - Алматы, Өскемен, Кызылордаға, облыс ішінде - Балқаш және Жезқазғанға әуе рейстері жүзеге асырылуда.