Қарағанды облысында тәртіп бұзушы жүргізушілер негізінен жылдамдықты асырған
Республикалық «Қауіпсіз жол» жедел-алдын алу іс-шарасы аясында мобильдік топ құрамы Қарағанды қаласында жұмыс істеді.
Іс-шараның бірінші күні жол қозғалысы ережесін бұзуға қатысты 540 факті анықталды. Тәртіп бұзушы жүргізушілер негізінен жылдамдықты асырған. Сонымен қатар, жалған нөмірі бар автокөлікті басқару, автомобильді заңсыз жабдықтау, қарама-қарсы жолаққа шығып кету, бағдаршамның тыйым салатын белгісіне өту және көлікті мас күйде жүргізуге қатысты фактілер тіркелді.
Бір жыл бұрын, 2018 жылғы 27 шілдеде ведомствоаралық жедел кеңесте облыс аумағында жолаушыларды, багажды заңсыз тасымалдаудың жолын кесу және стихиялық тұрақтарды жою мәселесі қаралған. Аталған кеңесте бірқатар тапсырма берілді. Осыған байланысты, Қарағанды облысы ПД Жергілікті полиция қызметі басқармасы жолаушылар мен багажды заңсыз тасымалдаудың жолын кесу бойынша бірлескен іс-шаралар жоспарын әзірледі.
Аталған жоспарды көліктік бақылау инспекциясы, Қарағанды облысының автомобиль жолдары және жолаушылар көлігі басқармасы, Қарағанды облысының Мемлекеттік кірістер департаменті, Қарағанды облысының ПД әкімшілік полиция басқармасы және Қарағанды көлік прокуратуралары келісіп және бекітті.
Аталған жоспардың іс-шараларын іске асыру үшін мобильдік топ құрылды. Қазіргі уақытта топ мүшелері жолдағы кемшіліктер мен заң бұзушыларды анықтауды жалғастыруда.