Қарағанды түрмелерінде сотталғандарға туыстарымен бейнебайланысқа шығуға мүмкіндік жасалды
Ведомствоның мәліметтерінше, қадағалаушы органның бұл бастамасы ізгі ниеттен туындаған. «Сотталған кейбір азаматтарға туған-туыстары қаржының жоқтығынан немесе жолдың алыстығынан келе алмайды. Енді олар туыстарымен және жақындарымен қысқамерзімді бейнебайланыстың көмегімен жүздесуге мүмкіндік алып отыр»,-деп хабарлады облыс прокуратурасының баспасөз қызметінен.
Ілкі жоба сотталғандардың тілектеріне байланысты енгізілді. Сотталғандардың бұл мәселеге қатысты пікірлері сауалнама арқылы анықталған.
Бұл ретте туыстарымен бейнебайланысқа шығу үшін сотталғандардың жүріс-тұрыстары мінсіз болып, мекеменің қоғамдық және мәдени шараларына белсенді қатысулары керек.
«Бейнежүздесу» облыс прокуратурасы ұсынған жалғыз ғана жоба емес. Алдағы уақытта интернет-ресурстардың көмегімен дін өкілдерінің дінің негіздерін түсіндіру мақсатында онлайн-сабақтарын да ұйымдастыру көзделіп отыр. Аталмыш бастама сонымен қатар сотталғандар арасында діни экстремизм мен терроризм мәселелеріне қатысты сауықтыру шараларын жүргізуге ықпал етеді. Бұл сондай-ақ сотталғандардың діни сауаттарын ашуға көмектеседі. Аталғандармен қоса, сотталғандарды қашықтықтан кәсіби оқытуды да қолға алу жоспарда бар.