Қарағандыда адам өліміне әкеп соққан жол апатынан кейін туысқандарының көмегімен жазадан жасырынғысы келген жас жігіттің ісі тергелуде
«ҚарМУ ауданында орын алған жол апаты фактісі бойынша сол күні ҚР ҚК-нің 3 бөлімі 345 бабы (абайсызда адам өліміне соққан жол қозғалысы ережелерін бұзу) бойынша сот алдындағы тергеу амалдары басталды. Кешенді автотехникалық және трассологиялық сараптамалар тағайындалды. Сараптамалардың қорытындысы бойынша соңғы процессуалдық шешім шығарылады», - делінген хабарламада.
ІІД-нің баспасөз қызметінен хабарлағандай, қазір күдікті азаматқа қатысты бұлтартпау шарасын тағайындау мәселесі шешіліп жатыр.
18 жасар Антон Ермачевтың өліміне әкеп соққан жол-апаты туралы әлеуметтік желілерде оның әпкесі Анна Ермачева хабарлаған. Марқұмның туыстары апатқа кінәлі адамның жазадан қашып құтылатыны жайында алаңдап отыр.
Хабарламада жол-көлік апатының 2 тамыз күні шамамен таңғы сағат 6-да КарМУ ауданындағы Университетская көшесі мен Шахтерлер даңғылының қиылысында орын алғаны жазылған.
Екі жеңіл көлік Toyota Camry мен Hyundai Accent соқтығысқан. Жол апаты салдарынан Hyundai Accent көлігінің 18 жасар жолаушысы алған жарақаттарынан ауруханада көз жұмды. Сол көліктің тағы бір жолаушысы - әйел адам ауруханада әлі күнге дейін ауыр халде жатыр.
«Бейнетүсірілімде көрініп тұрғандай, Toyota Camry көлігінің жүргізушісі, куәгерлердің айтуынан белгілі болғандай, Әбілқайыров Темірлан Шайменұлы жол қозғалысы ережелерін өрескел бұза отырып, оң жағынан тура бағытта келе жатқан, Hyundai Accent көлігінің жолын кескен. Соқтығысудан кейін Hyundai Accent ҚарМУ-дің темір дуалына соғылған», - делінген Анна Ермачеваның ашық хатында.
Автордың айтуынша, апатқа кінәлі адам оған бұл үшін еш жаза болмайтынын айтқан, себебі оның туыстары мемлекеттік құрылымдарда жұмыс істейді екен.
«Мен бұл туралы айтпас едім, бірақ оған бір жағдай итермеледі: жол-көлік апатын жасаған соң, олар менің інімнің демі таусыларда, еш көмектеспей, Ұлттық қауіпсіздік комитетіндегі байланыстарын айтып, қоқан-лоққы көрсеткен, «бәрін шешіп беретін туыстарына» телефон соғып, өз көлігінің бүлінген жерлерін - сызылған жерлері мен сынған фарасын түгендеумен болған. Осы сәттердің барлығы бейнетаспада бар. Осы орайда сұрақ туындап отыр: жоғары қызметтегі шенеуніктердің балалары мен туыстары қашанға дейін шектен шығып, жауапкершіліктен қашады?», - деп қаза болған жас жігіттің әпкесі әділеттікке шақыруға тырысқан.
Бойжеткеннің айтуынша, жол апатына кінәлі азаматтың кімнің баласы екенін білуі екіталай еді, алайда Toyota-дағы жастар туыстық байланыстарымен мақтанып, барлық жайтты өздері жайып салған.