Қарағандыда екі адамның ажалына себепкер болған жүргізуші қамауға алынды

ҚАРАҒАНЛЫ. ҚазАқпарат - Полиция қызметкерлері Toyota Camry-мен «ВАЗ 2107» және Mercedes-Benz автокөліктерін қағып, жол көлігі апатын жасаған 26 жастағы қарағандылық азаматты ұстап, қамауға алды. Апат салдарынан екі ер адам қаза тауып, екі әйел жарақат алды, деп хабарлайды «ҚазАқпарат» ХАА тілшісі.

Жол көлігі апатының себебі анықталды.  Toyota Camry-дің жолаушылар креслосында 26 жастағы қыз сіңілісімен отырған. Жүргізуші 5 қарашаға қараған түні Шахтеров даңғылынан Республика даңғылы бағытына қарай жылжып келе жатқан. Алдын ала мәліметтер бойынша көлікті басқара алмаған жүргізуші бір бағытта кетіп бара жатқан ВАЗ 2107-ге соғылған. Оны жанамалай соғып өткен Toyota Camry   қарсы бағытқа шығып, Mercedes-Benz-ке соғылған. Ауыр жарақат алған ВАЗ жүргізушісі мен жолаушысы апат орнында көз жұмды. Екеуі де 1972 жылы туған. Toyota Camry-дегі апалы-сіңілі екі жолаушы жарақат алды. Көрсетілген медициналық көмектен кейін олар үйлеріне қайтарылды.

Қарағанды облысы ішкі істер департаментінің баспасөз қызметінің басшысы Бақытжан Құдияровтың мәліметінше, ҚР ҚК-інің 345-бабы 4-бөлімінде көзделген «Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы» бойынша қылмыстық іс қозғалды.

«Күдікті уақытша ұстау оқшаулағышына қамауға алынды. Қылмыстық іс аясында тиісті сараптамалар тағайындалды», - дейді Бақытжан Құдияров.