Қарағандыда «G-Global - геосаясаттың жаңа пішімі» атты шара өтеді

АСТАНА. 12 қазан. ҚазАқпарат - 16 қазанда Қарағанды экономикалық университетінде ҚР Президенті Н.Назарбаевтың бастамасы болып табылатын «G-Global» халықаралық жобасына қолдау ретінде «G-Global - геосаясаттың жаңа пішімі» атты тақырыпта жиын өтеді. Шараға Парламент Сенатының депутаты Серік Нөгербеков пен Қарағанды облысының әкімі Бауыржан Әбдішев қатысады деп күтілуде.

Алқалы жиынға саясаттанушылар, экономистер, бизнес-қоғамдастықтардың, қоғамдық бірлестіктердің, саяси партиялардың, ғылыми мекемелер мен жастар ұйымдарының, профессорлық-оқытушылық құрамның өкілдері, сондай-ақ жоғары оқу мекемелерінің студенттері қатысатын болады. Онда «G-Global» жобасымен қамтылатын халықаралық мәселелер, сонымен бірге «G-Global» жобасын ары қарай дамыту мәселелері талқыланады.

Мәжіліске облыстың Жаңаарқа, Қарқаралы және Нұра аудандары, сондай-ақ Жезқазған мен Балқаш қалалары секілді бес өңірден бірқатар онлайн-байланыс өткізу жоспарланып отыр.

Жиын қорытындысы бойынша арнайы қарар қабылдау көзделеді.