03:26, 15 Қаңтар 2020 | GMT +6
Қарағандыда көлігінің жүксалғышына екі еліктің етін тиеп алған браконьер ұсталды
ҚАРАҒАНДЫ. ҚазАқпарат - Қарағанды облысында көлігінде екі еліктің еті және мылтығы бар ер адам ұстады, деп хабарлайды ҚазАқпарат тілшісі.
13 қаңтарда Қарағанды облысы полиция департаментінің табиғатты қорғау полициясы қызметкерлері «Браконьер» жедел-алдын алу іс-шарасын өткізу кезінде Бұқар жырау ауданының аумағында Қарағанды қаласының 63 жастағы тұрғыны мінген «Toyota Land Cruiser» маркалы автокөлігін тоқтатты.
Аталған автокөліктің салонынан 2 еліктің еті, тегіс ұңғылы қару мен патрондар тәркіленді.
«Ұсталған азамат кінәсін мойындады. Аталған факті бойынша »Заңсыз аң аулау« ҚК 337-бабының 1-бөлігі бойынша сотқа дейінгі тергеу басталды» деп хабарлады Қарағанды облысы ІІД баспасөз қызметі.