Қарағандылық отбасы мінген шағынавтобус Ресейде аударылып қалды
Порталдың мәліметіне сәйкес, «Сызрань - Саратов - Волгоград» тас жолының 192-ші шақырымында Volkswagen Transporter көлігі жол жиегіне шығып кеткен. Онда Евпаторияда демалып, Қарағандыға келе жатқан Гасичтер отбасы болған. Шағынавтобусты 37 жастағы анасы Оксана жүргізген. Оның 43 жастағы күйеуі Игорь, 2 жасар ұлы Иван мен 17 жастағы қызы Алена салонда болған.
«Анам көлікті қуып жету үшін жолдың қарсы бетіне шығып кетті, сол сәтте біздің алдымызда келе жатқан ВАЗ-2114 бізді қағып өтті. «Лада» кенеттен бізге соғылды. Біз жолдан шығып кеттік, жол жиегінде бірнеше рет аударылдық», - дейді автобустың жолаушысы Алена.
Оның айтуынша, «Лада» көлігінің рөлінде әйел адам отырған. Алайда жол апаты болған жерге келген полиция қызметкерлеріне көлікті ер адам басқарды деп айтқан.
Жол апатынан Volkswagen Transporter көлігінің 3 адамы - кішкентай бала мен оның ата-анасы зардап шекті. Олар ауруханаға жатқызылды.