Қарақалпақстанда арнайы майнинг аймағы құрылуы мүмкін
АСТАНА. KAZINFORM — Қарақалпақстанда криптовалюта өндіруге мамандандырылған арнайы аймақ құрылуы мүмкін. Бұл туралы ӨР президентінің қаулысында белгіленген.
Қаулыға сәйкес, 2025 жылдың қыркүйек айына дейін Қарақалпақстанда арнайы майнинг аймағын құру туралы қаулы жобасы әзірленуі тиіс.
Арнайы аймақта майнинг үшін жаңартылатын энергия көздерін пайдалануға рұқсат етіледі. Бірыңғай электр жүйесіне қосылған арнайы аймақтан электр энергиясын пайдаланған жағдайда арнайы тарифтер қолданылады.
2025 жылғы қарашада қаулы жобасы тиісті министрліктер және ведомстволармен келісе отырып, белгіленген тәртіппен Министрлер кабинетінің қарауына енгізіледі.
Майнинг — бұл криптовалюта өндіру әдісі (мысалы, биткоин). 2023 жылдың қазан айында Өзбекстанда майнинггті пайдалануға рұқсат беру тәртібі туралы ереже бекітілді.
Өзбекстанда рұқсатсыз криптовалюта өндіруге тыйым салынған.
Еске сала кетейік, Қазақстанның қаржы нарығында криптовалюта айырбастайтын ойыншылар пайда болады.
