Қармақшылық тұрғынды тылсым күш белгісіз тілде сөйлетеді

АСТАНА. ҚазАқпарат - Қызылорда облысы Қармақшы ауданының орталығы Қармақшы ауылында тұратын 31 жастағы Бауыржан Орынбаев есімді азамат он төрт жылдан бері өзге түгілі өзі де түсіне бермейтін белгісіз белгілерді жазудан, белгісіз тілде сөйлеуден арыла алмай келеді.

Ол түсініксіз әрекетке алғаш рет 17 жасында тап болған екен. Содан бергі уақытта түсініксіз түрлі жазу-белгілермен 41 қалың дәптерді толтырып үлгеріпті. Бауыржаннан өзі жазып-сызған белгілерді оқып беруін сұрай қалсаңыз ол еш мүдірместен зуылдата жөнеледі. Алайда Бауыржан жазған-сызғандарының мән-мағынасын ашып айтып бере алмайды. Ол оқып жатқанда құдды бір қисса-дастанды жатқа айтып жатқандай әсерге енеді. Бауыржан айтқан сөздерді ести қалсаңыз не араб, не парсы халықтарының көне тілі ме деп қаларыңыз анық. Себебі, әр сөздің дыбыс-ырғағы араб-парсы тіліне өте ұқсас келетінін аңғарасыз. Ал оған белгісіз бір дауыс "осыны жаз-сыз!" деп бұйыратындай.

Бауыржанның жақындары әлгі жазбаларды жергілікті дін өкілдері мен ғалымдарға көрсеткенімен, әзірге бұл тылсым күш, белгісіз құпияның сырын аша қоятын ешкім табылмай тұр. Кім білсін алдағы уақытта бұл құпияның ды сырын ашатын адам табылып қалар, деп жазады «Алаш айнасы».