Қаржы пирамидасына қатысы бар деген күдікпен 14 адам қамауда отыр – ІІМ
НҰР-СҰЛТАН. ҚазАқпарат – Жыл басынан бері ішкі істер органдары қаржы пирамидаларының үстінен 27 қылмыстық іс қозғаған, деп хабарлайды ҚазАқпарат тілшісі.
Бұл туралы Ішкі істер министрлігінің баспасөз қызметі ҚазАқпараттың ресми сауалына жолдаған жауабында мәлім етті.
«2022 жылдың 5 айында ішкі істер органдарында қаржы пирамидалары бойынша 27 қылмыстық іс тіркеліп, оның жетеуі ҚР Қаржы мониторингі агенттігіне жолданды. Компаниялардың үстінен жедел тергеу шаралары жүріп жатқандықтан, қылмыстық істің мән-жайы (оның ішінде компанияның атауы да) жариялауға жатпайды. Ішкі істер органдары Қылмыстық кодекстің 217-бабы бойынша 32 тұлғаны қылмыстық жауапкершілікке тартып отыр. Оның 14-і қамауда», - деп жазылған ведомство жауабында.
Бұған дейін қазақстандықтар қаржы пирамидасы белгілерін өздері тексере алатынын жазған едік.
