Қаскелең епископы Геннадий ЖИ-дың ықпалы жайында: Рухани мықты ұстаным қажет

АСТАНА. KAZINFORM – Әлемдік және дәстүрлі діндер көшбасшылары VIII Cъезі аясында Қаскелең епископы Геннадий жасанды интеллектінің рухани құндылықтарға ықпалына қатысты пікір білдірді. 

Қаскелең епископы Геннадий шіркеудің дәстүрлі түрде кез келген жаңа технологияны адамға пайда да, зиян да тигізе алатын құрал ретінде қарайтынын атап өтті. 

– Технологияларды адамның игілігі үшін де, зұлымдық үшін де қолдануға болатынын жақсы түсінеміз. Дегенмен, қазіргі уақытта пайда болып жатқан технологиялар адамды жылдам баурап алып жатыр. Біз ата-аналарымыз білмеген ақпараттық кеңістікте өмір сүрудеміз. Тіпті бес жыл бұрынғы қоғамның өзі мүлде басқа еді. Сондықтан бүгінде барынша сақ болу қажет, - деді епископ. 

Оның пайымынша, Президент Қасым-Жомарт Тоқаевтың жасанды интеллект саласындағы әдеп қағидаларын енгізу қажеттігі туралы айтқан сөзі қазіргі күн тәртібіндегі өзекті мәселені айқын көрсетіп берді.

– Заманауи технологиялар жаңа қауіптерді әкеліп, адам санасын басқару мүмкіндіктерін беріп отыр. Бұл жайында көп жазылып, жиі айтылып жүр. Виртуалды әлемге терең бойлаған адам кейде шынайы өмірден алыстап, қарапайым адами қарым-қатынас дағдыларынан айырылып қалады, - деді ол. 

Епископ Геннадий мұндай сын-қатерлерге қарсы тұруда берік рухани-адамгершілік ұстанымның көмегі зор екенін айтты.

– Егер адамның сенімі берік, моральдық және рухани тірегі мықты болса, онда жаңа технологиялар оған теріс әсер ете алмайды. Біз адамның ондай ұстанымды діннен алатынына сенімдіміз. Өйткені дін – мәңгі рухани құндылықтарды алып жүретін, адамды жақсылыққа жетелейтін күш, - деді ол. 

Астанада Әлемдік діндер көшбасшыларының съезі өтіп жатыр. 

Іс-шара барысында Қасым-Жомарт Тоқаев Жасанды интеллектіні дамыту әдебі жөніндегі дінаралық комиссия құруды ұсынды.