Каспий теңізі қазақстандық акваториясының солтүстік бөлігі тартылып барады
«Қазақстан Ғарыш Сапары» ҰК» АҚ-ның баспасөз қызметінен мәлім еткендей, ғарыштан жүргізілген мониторинг Каспий теңізінің тартылу ауқымын көрсетіп отыр.
«Тарихи кезең ішіндегі (15 жыл) әртүрлі уақыттағы ғарыштық түсірілім деректері бойынша Каспий теңізінің жағдайына мониторинг жүргізілді. Ғарыштық түсірілімдердің мұрағат деректеріне сәйкес, Қазақстан акваториясының солтүстік бөлігінде теңіз түбі көрінді. Каспий теңізі тартылып барады. Жерді қашықтықтан зондтау деректері бойынша соңғы 15 жылда Каспий теңізінің Қазақстандық секторының акваториясы айтарлықтай (7,1%-ға) қысқарды», -деп хабарлады компанияның баспасөз қызметі.
Компания Қазақстан Республикасының шекарасында 2008-2023 жылдар аралығындағы су бетінің ауданындағы өзгерістер динамикасын жариялады.
Теңіздің Қазақстан бөлігіндегі Атырау қаласына жақын жерде (Жайық өзенінің атырабы) кең тартылған аудандары байқалады.
«Каспий теңізінің қазақстандық секторының су беті ауданы 2008 жылы 113 866,67 шаршы шақырымды, 2023 жылы бұл көрсеткіш 105 745,23 шаршы шақырымды құрады. 15 жыл ішінде әртүрлі уақытта түсірілген ғарыштық суреттердің анализі су беті ауданының азайғанын анықтады. Бірақ, теңіз деңгейі төмендегені де мүмкін, бұл жан-жақты кешенді зерттеуді қажет етеді. Каспий теңізі деңгейінің төмендеуі экожүйеге де, теңіз шаруашылығына да әсер ететін бірқатар жағымсыз салдарға әкелуі мүмкін. ЖҚЗ мәліметтеріне сәйкес ең осал орын Атырау қаласына жақын жердегі Каспий теңізінің қазақстандық бөлігі болып табылады», -деп мәлім етті баспасөз қызметі.
Еске сала кетелік, бұдан бұрын Каспий жағалауындағы қамыс өртіне 500 тонна су төгілгенін, от ошағы әлі бықсып жатқанын жазған едік.