Каспий теңізінде «Бекіре» операциясы басталған 2 айда 128 браконьер ұсталды
НҰР-СҰЛТАН. ҚазАқпарат – Каспий теңізінде сәуір айында басталған «Бекіре» операциясы барысында Шекара қызметі 128 құқық бұзушыны ұстаған, деп хабарлайы ҚазАқпарат ҚР Ұлттық қауіпсіздік қызметінің баспасөз қызметіне сілтеме жасап.
«Каспий теңізінің су биологиялық ресурстарын сақтау және ұтымды пайдалану туралы үкіметаралық Келісімнің міндеттемелерін орындау мақсатында Шекара қызметі табиғат қорғау органдарымен бірлескен іс-қимыл аясында сәуір айынан бастап ведомствоаралық кең ауқымды «Бекіре» акциясына қатысып жатыр»,-делінген хабарламада.
Аталған кезеңде қазақстандық шекарашылар Каспий теңізінің акваториясында 59 жүзу құралын пайдаланған 128 құқық бұзушыны ұстаған. Сондай-ақ 308 км астам браконьерлік кәсіпшілік құралдары (торлар) алынып, теңізге бекіре тұқымдас балықтардың 702 данасы және 2 132 ұсақ түрлері шығарылды, 3,1 млн. теңгеге айыппұл салынды.
«Алды алынған залалдың мөлшері 1,1 млрд. теңгеден астам соманы құрап отыр. Бірлескен іс-шаралар жалғасуда»,-деп мәлім етті баспасөз қызметі.
Каспийде браконьерлердің әрекетінен келген шығын алдын ала есеп бойынша 1,1 млрд теңгедан асады
