Қатар-2022: Криштиану Роналду екі ойын қатарынан негізгі құрамнан тыс қалды

АСТАНА. ҚазАқпарат – Әйгілі футболшы Криштиану Роналду әлем чемпионатында қатарынан екінші ойында негізгі құрам сапында алаңға шыққан жоқ, деп хабарлайды ҚазАқпарат тілшісі.

Дәл қазір 1/4 финалында Марокко және Португалия құрамаларының кездесуі өтіп жатыр. Құрамалар жартылай финалға берілетін жолдамаға таласады. Әзірге есеп 0:0.

Португалия құрамасының бас бапкері Фернанду Сантуш негізгі құрамда Криштиану Роналдуды шығарған жоқ. Оның орнына Гонсалу Рамушқа сенім білдірді.

Гонсалу Рамуш бұдан бұрын Швейцария құрамасына қарсы кездесуде алғашқы рет негізгі құрамда алаңға шықты. Қарсылас құрама қақпасына хет-трик жасап үлгерді.

Айта кетсек, Криштиану Роналду ұлттық құрама сапында 2003 жылдан бері 195 кездесуде 118 голдың авторы атанды.

Фото: KIERAN CLEEVES/GETTY IMAGES