Қатарлықтар Bereke Bank-тен басқа қай салаларға инвестиция салып жатыр
АСТАНА. KAZINFORM – Бүгін Мәжілістің жалпы отырысында «Қазақстан Үкіметі мен Қатар Үкіметі арасындағы басым салалардағы жобаларды дамыту үшін ұзақмерзімді стратегиялық әріптестік орнату туралы келісімді ратификациялау туралы» Заңы қабылданды.
Мемлекет басшысының 2024 жылғы ақпандағы Қатарға сапарының қорытындысы бойынша екі ел арасындағы уағдаластықтарды іске асыру үшін биылғы 20 наурызда Доха қаласында Келісімге қол қойылды.
«Келісім инвесторлар үшін тәуекелдерді азайтуды, тартымды инвестициялық орта қалыптастыруды көздей отырып, елімізге жалпы сомасы 20 миллиард АҚШ долларына жуық инвестиция тартуға мүмкіндік береді. Жалпы, Келісімде елімізде телекоммуникация, энергетика, газ өндіру және тасымалдау, қаржы салаларын қоса алғанда, 9 бірлескен инвестициялық жобаны іске асыру ескерілген. Оның ішінде «BEREKE BANK» АҚ-ның 100% акциясын «LESHA BANK»-тың сатып алуы жөніндегі жобасы қамтылған. Бұл жоба Мемлекет басшысының 2023 жылғы Қазақстан халқына Жолдауы аясында қаралған банк саласындағы бәсекелестікті арттыру мақсатында елге 3 сенімді шетелдік банкті тарту тапсырмасының іске асырылуын қамтамасыз етеді. Жобаны іске асыру қаржы жүйесіне жаңа капитал тартуға мүмкіндік береді», - деді ҚР Премьер-Министрінің орынбасары –Ұлттық экономика министрі Нұрлан Байбазаров.
Оның айтуынша, «Қазақтелеком» АҚ-ның «МОБАЙЛ ТЕЛЕКОМ»-СЕРВИСІН» қатарлық «Power INTERNATIONAL HOLDING» компаниясына сатуы телекоммуникация саласында бәсекелестіктің өсуіне ықпал етеді.
«Келесі келісім қуаттылығы жылына 1, 2.5, 6 млрд текше метр газ өңдеу зауыттарын салу жөніндегі 3 жобаны қамтиды. Аталған жобаларды іске асыру Қашаған кен орнының ресурстық базасын ұтымды пайдалануға, сондай-ақ елдің ішкі қажеттіліктерін жабу үшін тауарлық газ өндірісін ұлғайтуға бағытталған. Газ өңдеу зауыттарының іске қосылуы жылына 6,9 млрд текше метр тауарлық газды, 410 мың тонна сұйытылған көмірсутек газын, 60 мың тонна газ конденсатын және 770 мың тонна күкірт өндіруге мүмкіндік береді. Жалпы, аталған жобалар елімізде тауарлық газ өндірісінің көлемін 18%-ке ұлғайтады», - деді министр.
Келесі жоба «БЕЙНЕУ-БОЗОЙ-ШЫМКЕНТ» магистральдық газ құбырының екінші желісін салуға қатысты. Жобаны іске асыру еліміздің энергетикалық қауіпсіздігін қамтамасыз етуге мүмкіндік береді. Сондай-ақ газ тасымалдау жүйесінің өткізу қуатын ұлғайтуды, Қытай Халық Республикасы бағыты бойынша газ экспортының көлемін сақтауды, Алматы жылу электр орталығын газға ауыстыруды қамтамасыз етеді. Жалпы, жобаны іске асыру оңтүстік, орталық және солтүстік өңірлердің ұлғайып отырған қажеттіліктерін қанағаттандыруға және экспорттық көлемді қолдауға мүмкіндік береді.
Бұдан бөлек, КС-14 жаңа компрессорлық станциясы мен «КС-14-ҚОСТАНАЙ-АҚТӨБЕ» магистральдық газ құбырын салу жобасы қамтылған. Жоба Қостанай қаласы мен Қостанай облысының тұрғындарын газбен жабдықтауды қамтамасыз етуге, сондай-ақ еліміздің газ тасымалдау жүйесінің өткізу қуатын арттыруға бағытталған. Жоба Қостанай облысын және жергілікті өнеркәсіп кәсіпорындарын газбен жабдықтауды қамтамасыз етеді, бұл өңірдің энергетикалық қауіпсіздігін арттырады.
Қызылорда облысында бу-газ қондырғысы базасында электр станциясын салу жобасы ескерілген. Жобаны іске асыру жаңа маневрлік қуаттарды енгізу мақсатында бу-газ қондырғысын салуға, сондай-ақ «Қызылорда-Шымкент» және «Қызылорда-Жезқазған» электр беру желілерін салуға бағытталған.
«Ертіс өзенінде қуаты 350 МВт-қа дейін су электр станциясын салу жобасы қарастырылған. Жоба жаңа маневрлік қуаттарды енгізу, сондай-ақ Шүлбі су электр станциясының контрреттеу функциясын орындау мақсатында әзірленді. Жобаны іске асыру Шүлбі су электр станциясының тиімділігін 1050 МВт-қа дейін ұлғайтуға, сондай-ақ Ертіс өзенінің ағысы бойынша қысқы кезеңде су тасқыны ықтималдығын жоюға мүмкіндік береді», - деді ведомство басшысы.
Атап айтқанда, қабылданған келісімде қазақстандық тарап қатарлық инвестициялар үшін тұрақты салық режимін, сондай-ақ Қазақстан аумағында қатарлық инвестицияларды қорғауды қамтамасыз етеді.
