Қатерлі ісіктен болатын өлім-жітім төмендеді - Ермек Көшербаев

АСТАНА. KAZINFORM — Өңірлерде медициналық қызметкерлер жетіспейді. Бұл туралы Парламент Мәжілісінде ҚР Премьер-Министрінің орынбасары Ермек Көшербаев мәлім етті.

- Денсаулық сақтау саласы - Үкімет жұмысының басым бағытының бірі. Салада біраз жұмыстар атқарылды. Былтыр бала өлімі 8,3 пайызға, ана өлімі 11,3 пайызға азайды. Халықтың нысаналы топтарын онкологиялық скринингпен қамту 16 пайызға өсті. Атап айтқанда, 2 млн 800 мың адам онкологиялық скринингтен өтті. Нәтижесінде, қатерлі ісіктен болатын өлім-жітім көрсеткеткіші 2,8 пайызға төмендеді, - деді Е.Көшербаев.

Ол Үкімет «Ауылда денсаулық сақтауды жаңғырту» ұлттық жобасын жүзеге асырып жатқанын еске салды. Жоба аясында 467 нысанның құрысы аяқталды. 188 нысанды жыл соңына дейін іске қосылады.

- Сонымен қатар, облыстарда ірі заманауи медициналық нысандардың құрылысы жүріп жатыр. Оларды тиісті мерзімде әрі сапалы аяқтауды облыс әкімдеріне тапсырдық. Бұл жұмыс біздің ерекше бақылауда тұр. Өңірлерде медициналық қызметкерлердің жетіспейтіні рас. Бұл мәселе кезең-кезеңмен шешіліп келеді. Мемлекет тарапынан жас мамандарға үстемақы төлеу, гранттар санын көбейту, әкімдіктер арқылы тұрғын үй беру қарастырылған, - деді Үкімет басшысының орынбасары.

Бұдан бұрын хабарланғандай, енді МӘМС-пен қамтылмағандар ақысыз онкологиялық скринингтен өте алады.