Катонқарағай ауданының халқы мал соятын қасапхана таппай, қиналып отыр
ӨСКЕМЕН. KAZINFORM – Шығыс Қазақстан облысындағы Катонқарағай ауданының халқы ауылдарда қасапхана жоқтығынан мал соя алмай отырғандықтарына шағымданды. Жұмыс істеп тұрған жар дегенде жалғыз қасапхана аудан орталығында орналасқан. Ал оған барып отыру - қалтаға қосымша салмақ.
«Алып-сатарларға арзанға беруге мәжбүрміз»
Катонқарағай ауданында халықтың негізгі екі табыс көзі бар. Оның бірі – мал шаруашылығы, екіншісі – туризм. Алтайдың алты айға созылатын қысында туризмнен пайда түспейді. Сол үшін елдің көбі Қазақстанның барлық ауылдарындағы сияқты төрт-түліктің сүмесін нәпақа етеді. Алайда жұрт елді мекендерде қасапхананың жоқтығы қиындықтың қамытын кигізіп тұрғанын айтуда.
- Бізде аудан бойынша жалғыз қасапхана бар. Ол Катонқарағай ауылында орналасқан. Мысалы, бір жылқыны сою үшін көлік жалдап, оны сол жаққа тасуға тура келеді. Одан соң сойып берген қасапшы мен анықтама жазған мал дәрігеріне ақша төлейміз. Сонда бір жылқының етін сатамын деп қаншама әбігерге түсеміз, - дейді тұрғындар.
Аудан орталығына жақын ауылдарға сәл жеңілдеу. Алайда Берел сияқты 80 шақырым жердегі ауылдардың халқына бұл қосымша шығын.
- Осының салдарынан малымызды алып-сатарларға арзанға бере саламыз. Олар өздері малдың бәрін жиып, сойдыруға апарады. Соларға тиімді. Ал біз сияқты қарапайым малшылар мына қымбатшылық қысып бара жатқан уақытта пайда көре алмай отырмыз, - деп наразылықтарын білдірді катонқарағайлықтар.
Әкімдік не дейді?
Талайды толғантқан түйткілді мәселеге қатысты аудан әкімдігінің жауабын білу үшін ресми сауалхат жолдадық.
- Ауыл шаруашылығы министрінің 2015 жылғы 27 сәуірдегі №7-1/370 бұйрығына сәйкес, еті саудаланатын кез келген мал арнайы қасапханаларда сойылуы шарт. Алайда мал сою нысандарын мемлекет тарапынан салу, қаржыландыру, күтіп-ұстау қарастырылмаған. Қызметтің бұл түрі ветеринариялық кәсіпкерлік болып саналады. Яғни, мұндай алаңдарды жеке кәсіпкерлер немесе ауыл адамдары бірлесе отырып, өз қаражаттарына салуы керек, - деп жауап берді Катонқарағай ауданы әкімінің міндетін атқарушы Расул Карабалинов.
Оның айтуынша, Катонқарағай ауылындағы қасапхана 2008 жылы ашылған. Жер көлемі 1 гектарды құрайды.
- Ғимарат ішінің көлемі - 150 шаршы метр. Ауласында 50 басқа арналған қорасы бар. 60 тонна ет сақтайтын тоңазытқышпен жабдықталған. Күніне 25-30 бас малды қабылдайды. Яғни, 5 тоннаға дейін ет союға болады. Қасапхана иесі - жеке кәсіпкер Гаухар Таукенова, - дейді Расул Карабалинов.
Демек, бұл мәселеде ауыл халқы әкімдіктен үміт күтпей, өздері амалдаулары тиіс. Қалтасы қалың жеке кәсіпкерлерге қолқа салып немесе «көп түкірсе - көл» дегендей, өздері жиыстырып қасапханалар салулары қажет.
Еске салсақ, бұған дейін Ауыл шаруашылғы министрі Айдарбек Сапаров мал шаруашылығын дамытуға кооперативтер арқылы беріліп келген субсидиялар тоқтайтынын айтқан.
