Катонқарағай мен Зайсанда салынатын әуежайларға кардлар қайда дайындалады

ӨСКЕМЕН. KAZINFORM – Шығыс Қазақстан облысында Президент тапсырмасымен құрылысы басталған Катонқарағай мен Зайсандағы әуежайлар үшін авиация саласы бойынша мамандар даярланбақ.   

Катонқарағай ауданындағы әуежай Белқарағай мен Өрнек ауылдарының арасында, «Өскемен-Рахман қайнары» жолының маңында салынады. Катонқарағай ауылынан 25 км, Үлкен Нарын ауылынан 62 км қашықтықта орналасады.

Ал, Зайсан ауданындағы әуежай бұрынғы Сатбай әскери аэродромының орнында, «Омбы-Майқапшағай» тасжолына жақын жерде бой көтереді. Бұл – Зайсан қаласынан 25 км, Ақжар ауылынан 85 км қашықтықтағы жер.

ҚР Көлік министрлігінің мәліметінше, келесі туристік маусымға дейін Зайсан және Катонқарағай аудандарындағы әуежайлар алғашқы рейстерді қабылдауға дайын болуы тиіс. 

Құрылыстың бастапқы кезеңінде әуежайларда ұзындығы 2200 метр, ені 45 метр ұшу-қону жолақтары салынады. Бұл Q400, ATR 42/72, CRJ200 ұшақтарын қабылдауға мүмкіндік береді. Осылайша, Шығыс Қазақстанда Катонқарағай, Зайсан, Тарбағатай аудандары мен Үлкен Нарын аймағы әуе қатынасымен қамтылады. Астана, Алматы, Өскемен және Семейге ішкі рейстер, Қытай мен Ресейге халықаралық бағыттар ашу жоспарланып отыр. 

– Саратовка колледжінде келесі оқу жылынан бастап авиация саласы бойынша мамандарды даярлау басталады. Олар тәжірибеден Шығыс Қазақстандағы тікұшақ отряды базасында өтеді. Біздің міндетіміз – жаңа әуежайларды жоғары білікті кадрлармен қамтамасыз ету, - деді ШҚО әкімі Нұрымбет Сақтағанов. 

Еске салсақ, бұған дейін Зайсан әуежайында негізгі құрылыс жұмыстары басталғаны хабарланған.