Қай өңірлерде кадр тапшылығы туындайды — министрлік болжамы
АСТАНА. KAZINFORM — Алдағы жылдары еліміздің қай өңірлерінде кадр тапшылығы туындауы мүмкін? Бұл сауалға Еңбек және халықты әлеуметтік қорғау вице-министрі Олжас Анафин жауап берді.
— 2030 жылы жұмыс күші 10 миллион адамға, 2037 жылы 11 миллионға, ал 2044 жылы 12 миллион адамға жетеді деп күтілуде. Негізгі еңбек ресурстарының ағыны мегаполистерде сақталады. 2030 жылға қарай өңірлерде жұмыс күшінің ұсынысы 2024 жылмен салыстырғанда 530 мың адамға, ал 2040 жылға қарай 1,9 миллион адамға артады. Осыған байланысты солтүстік өңірлердегі жұмыс күшінің саны 2030 жылы 64 мың адамға, 2040 жылы 115 мың адамға азаюы мүмкін. Орталық және шығыс өңірлерде көрсеткіш сәйкесінше 53 мың және 125 мың адамға қысқарады, — деді Олжас Анафин Сенат қабырғасында өткен іс-шара барысында.
Одан әрі вице-министр 2050 жылға қарай еңбек нарығында болатын өзгерістерге тоқталды.
— Біздің болжамы бойынша қазіргі үрдістер сақталған жағдайда 2050 жылға қарай Астана, Алматы және Шымкент қалаларында жұмыс күшінің ұсынысы екі есе артады, ал солтүстік, орталық және шығыс өңірлерде бұл көрсеткіш 18%-ға қысқарады, — деп болжап отыр министрдің орынбасары.
Оның айтуынша, еңбек нарығына туу көрсеткіштері әсер етеді.
— 1999 жылы Қазақстанда 217 мың бала дүниеге келген;
— 2004 жылы — 273 мың бала;
— 2010 жылы — 367 мың бала.
Қазір және алдағы жылдары аталған буын өкілдері еңбек нарығына қосыла бастайды.
— 2025 жылы еңбек нарығына 265 мың адам шығады;
— 2028 жылы олардың саны 300 мыңнан асады;
— 2030 жылдан бастап жыл сайын 350 мыңнан астам адам еңбек нарығына қосылады. Сәйкесінше жұмыс күшіне сұраныс артады.
Министр орынбасарының айтуынша, кейбір өңірде еңбек ресурстарының тапшылығы байқалуда және ол үрдіс уақыт өте келе күшейе түседі. Сонымен қатар, кейбір өңірдің шекараға жақындығы және көрші елдердегі еңбек нарығындағы күрделі жағдай кадр тапшылығын одан әрі арттыруы мүмкін.
Бұған дейін елімізден қандай сала мамандарының кетіп жатқаны туралы хабарлаған болатынбыз.
Одан бөлек, жиын барысында қазақстандықтардың солтүстік өңірлерден көшуі жалғасып жатқаны айтылды.
