Қайырымдылық көмек механизмдерін жетілдіру қажет – Аида Балаева

АСТАНА. KAZINFORM – Мәдениет және ақпарат министрі Аида Балаева еріктілер қозғалысының белсендісі, қайырымдылық қор құрылтайшысы Перизат Қайратқа қатысты тергеуге пікір айтты.

«Волонтерлер қозғалысының белсендісі әрі қоғамдық қайырымдылық қорының құрылтайшысы Перизат Қайратқа қатысты шулы тергеу қайырымдылық көмегін көрсету механизмдерін жетілдірудің қажеттілігін тағы да еске салып отыр. Қазіргі кезде Қазақстанда волонтерлік пен қайырымдылық белсенді түрде дамып келеді», - деп жазды Аида Балаева желідегі парақшасында. 

Министрдің айтуынша, қайырымдылық шаралары алаяқтықпен мен пайдакүнемдік әрекеттерге де қолайлы жағдай туғызады.

«Сондықтан барлық қазақстандықтарды қайырымдылық көмек операторларын мұқият зерттеуге және тек тексерілген әрі сенімді серіктестермен ғана жұмыс істеуге шақырамын», - дейді ведомство басшысы.

Бұған дейін еріктілер қозғалысының белсендісі және қоғамдық қайырымдылық қорының құрылтайшысы Перизат Қайратқа қатысты тергеу жүріп жатқанын хабарлаған едік. Ол көктемгі су тасқынынан зардап шеккен азаматтарға көмектесу үшін жиналған 1,5 млрд теңгеден астам қаражатты жымқырды деп күдіктелуде. 

Одан бөлек, Аида Балаева қайырымдылық мақсатында ақша жинауды реттеу керектігін айтқан еді.