Қайта құрылған «Ертіс» командасы Шымкентте оқу-жаттығу жиынын өткізіп жатыр

ПАВЛОДАР. KAZINFORM - Сергей Якушиннің шәкірттері бүгінге дейін үш жолдастық кездесу өткізіп, соның екеуінде жеңіске жетті. Соңғы ойында оралдық «Ақжайықтан» басым түсті.  

Pavlodarnews.kz порталының хабарлауынша, «Ақжайықтың» қақпасына жауапсыз жалғыз доп соғылды. Голдың авторы – Руслан Есімов.

Павлодарлық команда сапында жасыл алаңға Политик, Нырков, Крюков, Воменко, Попов, Асайынов, Искаков, Абдуалиев, Байжанов және Есімов шықты. Бұл футболшылар - команданың негізгі құрамдағы ойыншылары.

«Ақжайық» өткен маусымда Премьер-лигада өнер көрсеткенін ескерсек, бұл жеңіс «Ертіс» үшін маңызды саналды.

Бұған дейін Ертіс оқу-жаттығу жиыны барысында «Түркістанмен» кездесіп, 0:0 есебімен тең түсті. Ал, «Ордабасы М» командасын 2:0 есебімен жеңді. 

Шымкент қаласындағы оқу-жаттығу жиыны 29 ақпанға дейін жалғасады.

Еске сала кетейік, Павлодарлық «Ертіс» футбол клубы жаңа маусымда Екінші лигада ойнайтын болды.