Қайтарылған активтер есебінен СҚО-да балабақша салынып жатыр

ПЕТРОПАВЛ. KAZINFORM — 4 маусымда Солтүстік Қазақстан облысы прокурорының бірінші орынбасары Абу-Али Саттар әкімдік өкілдерімен бірлесіп Петропавл қаласында балабақша құрылысын тексерді. 

Солтүстік Қазақстан облысының прокуратурасының мәліметінше, объект прокуратура органдары қайтарған активтер есебінен салынады. Жобаның жалпы сомасы 1,9 млрд теңге.

— Балабақша 280 орынға есептелген, бұл кезектілікті қысқартады және балаларды оқыту мен дамыту үшін заманауи жағдайлар жасайды. Бүгінгі таңда жұмыс 40 пайызға аяқталды. Нысанды тапсыру биыл желтоқсан айына жоспарланған, — делінген хабарламада.

Солтүстік Қазақстан облысы бойынша барлығы қайтарылған активтер есебінен 33 жоба іске асырылып жатыр.

Әлеуметтік нысандардың құрылысы — бұл өңірдің дамуына және болашақ ұрпақтың әл-ауқатына қосқан үлесі. 

Айта кетелік қайтарылған активтер қаражаты есебінен 400-ден астам әлеуметтік нысан салынып жатқаны туралы жазған едік.