Қайтарылған активтердің қаншасы мемлекет меншігіне өтті
АСТАНА. KAZINFORM – «Қайтарылған активтерді басқару компаниясы» ЖШС өз балансына қабылданатын мүліктің мәліметтерінен сәйкессіздік көрсе, мемлекет меншігіне алудан бас тарта алады. Бұл туралы Қаржы министрлігінің Kazinform сауалына жолдаған жауабында айтылған.
«Қайтарылған активтерді басқару компаниясы» ЖШС 100% мемлекеттің меншігіндегі мекеме болып есептеледі. Басқарушы компанияның негізгі міндеттерінің бірі – мемлекетке қайтарылған активтерді мемлекеттің атынан меншікке қабылдау. Ақшалай қаражат түріндегі активтер басқарушы компанияны айналып өтіп, тікелей Арнайы мемлекеттік қорға аударылады.
Активтердің мәлімделген жай-күйіне сәйкес келмеуі анықталған кезде активтердің сәйкессіздігі туралы акт жасалып, активтерді қайтару жөніндегі уәкілетті органға хабарланады. Егер актив жоғалған немесе активке қажетті құқықты растайтын құжаттар болмаған жағдайда, басқарушы компания оны қабылдаудан бас тартуы мүмкін», - деп жазылған министрлік мәліметінде.
Активтер қабылданғаннан кейін басқарушы компания олардың сақталуын және қызметін қамтамасыз ету үшін күзет ұйымдарын тартып, коммуналдық және өзге де қызмет көрсету шарттарын жасауға, мүлікті жоғалту тәуекелдерінен сақтандыруға хақылы.
Активтер сатылғанға дейін компания оларды жалға беру, сенімгерлік басқару, өз бетімен басқару арқылы үздіксіз жұмыс істеуін қамтамасыз етеді.
«Басқарушы компания құрылған сәттен бастап (2023 жылдың 21 қыркүйегі – ред.) 2024 жылғы 17 қазанға дейін компанияның балансына 62 актив берілді: 1 тұрғын үй; 2 әкімшілік ғимарат; 7 коммерциялық ғимарат; «Думан» қонақ үй кешені; «Думан» қонақүй кешенінің негізгі құралдары және техникалық-материалдық құндылықтары; 5 заңды тұлғаның жарғылық капиталына қатысу үлестері; 1 өндірістік база; 1 асхана; 1 жанармай құю станциясы; 13 жер учаскесі; «Орион» бизнес орталығының 1 аяқталмаған құрылысы және «Байсат» сауда үйі түріндегі 1 мүлік», - деп жазады министрліктегілер.
Сондай-ақ, компанияға 196 дана зергерлік бұйым, коллекциялық монета, кәдесый және аксессуар тапсырылған.
«Сонымен қатар, шетелден қайтарылған активтер бар: 2 автокөлік, Дубайдағы 2 вилла, Францияның Антиб қаласындағы 4 пәтер, Түркиядағы 2 үй және 1 пәтер, Мәскеудгіе 5 пәтер, 5 қойма және 5 автотұрақ орны.
Бұған қоса, жалпы құны 2,5 млрд теңге болатын 7 жер учаскесі мен тұрғын үйді беру туралы келісімшарттарға қол қойылды. Сондай-ақ, 390 млн теңге сомасындағы компанияның жарғылық капиталына қатысу үлесін беру процесі жүріп жатыр», - делінген жауапта.
Айта кетсек, бұған дейін Қазақстан қайтарылған активтерді сатудан қанша табыс тапқаны туралы мәлімет берілген болатын.
Сондай-ақ Үкіметтің баспасөз қызметі Түркістан және Ақмола облыстарында мемлекетке қайтарылған қаражат есебінен әлеуметтік нысандар салынатынын мәлім етті.
