Қайтыс болған науқастың туыстары қостанайлық жедел жәрдем фельдшерін соққыға жықты

АСТАНА. KAZINFORM — Фельдшерге шабуыл шақырулардың бірінде болған. Қазіргі уақытта зардап шеккен медицина қызметкері ауруханада, қылмыстық іс қозғалды.

Бұл оқиға туралы ақпарат әлеуметтік желіден белгілі болды. Зардап шеккен фельдшер өз парақшасында бар шындықты айтқан.

— Адамдар қандай қатыгез. Кеше алғашқы медициналық көмек көрсетіп жатқан жерімде мені ұрып тастады. Олар мені өлтіргісі келді. Мен миым шайқалып, ішім жарақаттанып, ауруханаға түстім, — деп жазды медицина қызметкері.

Бұл деректі облыстық жедел жәрдем станциясының баспасөз қызметі растады. Олардың айтуынша, фельдшерге қызметтік міндеттерін орындау кезінде шабуыл жасалған. Ол ауруханаға жатқызылды.

Полиция қылмыстық іс қозғалғанын хабарлады.

— Алғашқы медициналық көмек көрсету кезінде үй иелері мен дәрігерлер арасында жанжал туындап, оның барысында 41 және 51 жастағы әйелдер фельдшердің денесіне зақым келтіргені анықталды, — деді полиция.

Сот-медициналық сараптама тағайындалды. Тергеу «ұрып-соғу» бабы бойынша жүргізіліп жатыр.

Бұған дейін Бейнеуде мас адам жедел жәрдем қызметкерлеріне шабуыл жасағанын жаздық.