«ҚазАгроҚаржы» ресейлік банктен 1,8 млрд рубль қарыз алады

АСТАНА. ҚазАқпарат - «ҚазАгроҚаржы» АҚ 1,8 млрд. ресейлік рубль сомасында қарыз тарту туралы ресейлік «Ситибанк» акционерлік қоғамымен екі жақты кредиттік келісімге қол қойды. Бұл туралы компанияның баспасөз қызметінен хабарланды.

Аталған қаражат қазақстандық аграршылардың қажеттіліктеріне жұмсалатыны көзделіп отыр. Соның ішінде, Ресейде шығарылатын ауыл шаруашылығы техникасын сатып алынып, кейіннен оны қазақстандық шаруаларға лизинг арқылы өткізу де қарастырылған.
«Қазіргі экономикалық жағдайда ұлттық валюта - теңгемен қорландыру бағыты біршама күрделілеу болып отыр. Сондықтан да, Ресей рублімен қаржыландыру тарту, валюта нарығында тұрақсыз жағдай туындаған жағдайда, валюта тәуекелін барынша азайтуға мүмкіндік беретін балама қаржыландыру көзі болып табылады. Өйткені, ресейлік рубль бағамының корреляциясы қазақстандық теңгемен қатынасында анағұрлым жоғары», - делінген баспасөз баянында.
Еске сала кетейік, «ҚазАгроҚаржы» АҚ - инвестициялық жобаларды қаржыландыру және лизингке ауыл шаруашылығы техникалары мен технологиялық жабдықтарды жеткізу міндетімен айналысады.