«Қазақ ертегілерінің кейіпкерлері» тақырыбында пошта маркалары топтамасы шығарылды (ФОТО)

АСТАНА. ҚазАқпарат - «Қазпошта» акционерлік қоғамы балалар арасында ұйымдастырылған конкурс жеңімпаздарының суреттерін пайдалана отырып, «Балалар сурет салады» маркалар топтамасын шығарды.

14 қаңтарда Қазақстан Республикасы Білім және ғылым министрлігі Балалардың құқығын қорғау комитеті «Қазпошта» акционерлік қоғамымен бірлесе отырып, «Қазақ ертегілерінің кейіпкерлері» тақырыбында «Балалар сурет салады» төрт маркалар топтамасын айналымға енгізу салтанатын өткізді, деп хабарланған ҚР БҒМ сайтында.

Айта кетейік, Балалар құқығын қорғау комитеті 2014 жылы балалар үйлерінің тәрбиеленушілері арасында «Қазақ ертегілерінің кейіпкерлері» тақырыбында сурет салу конкурсын ұйымдастырған болатын. Конкурсқа Қазақстанның барлық өңірлеріндегі балалар үйлерінің тәрбиеленушілерінің 200-ден астам суреттері қатыстырылды. Оның қорытындысы бойынша жеңімпаздар ретінде Жамбыл облысынан Талипов Дмитрий, Батыс Қазақстан облысынан Муштубаева Эльвира, Қостанай облысынан Сидоров Александр, Астана қаласынан Василенко Раиса анықталды. Байқау Қазақстан Республикасының Балалар құқығын қорғау туралы конвенцияны ратификациялаудың 20 жылдығымен ұштастырылған.