Қазақ халқына салт-дәстүрі мен тілін меңгеру арқылы да алғыс айтуға болады – ҚХА кеңесінің мүшесі
АСТАНА. KAZINFORM – Астанадағы Бейбітшілік және келісім сарайына Алғыс айту күні мен Қазақстан халқы Ассамблеясының 30 жылдығының ресми ашылуына жиналған түрлі этностың өкілдері айтулы күннің мәні мен маңызы туралы пайымын ортаға салды. Сол жылы лебіздерді ықшамдап, оқырман назарына ұсынамыз.
Хасан Шарипов, ҚХА Өзбек этномәдени бірлестігінің төрағасының орынбасары:
- 30 жыл ішінде біз жастарға үлгі болатындай біраз дүниеге куә болып келеміз. Бірлік пен татулық болғанда ғана экономикамыздың дамитынын уақыт көрсетіп отыр. Бәріміз бір отбасы болып Қазақстанда тұрып жатырмыз. Бүгін таңертең тұра салып әуелі отбасыма алғыс айттым. Ал осы шараны пайдаланып, Қазақстан халқына, аға буынға алғыс айтқым келеді. Алғысымыз шексіз.
Ирина Микаелян, Армян этномәдени бірлестіктері қауымдастығының төрайымы:
- Көктемнің алғышқы күнін бір-бірімізге алғыс айтудан бастаймыз. Бұл алғыс айтудың тамыры тереңде жатыр. Саяси қуғын-сүргін кезінде көптеген этностар Қазақстанға қоныс аударылды. Сол кезде қазақ халқы үйсіз қалғандарға пана болды, аш қалғандарға аузындағы асын бөліп берді. Қазақ халқының осы мейіріміне алғыс айтатын бір күннің белгіленуі осы тұрғыдан қисынды. Қазір Қазақстанда 18 мың армян этносының өкілі тұрып жатыр. Азаматтығы жоқ болса да тұрақты мекен етіп жатқан қандастарымыз бар. Қуғын-сүргін аяқталғаннан кейін қызмет бабымен, саяхаттап келіп те осы елде қалып қойған армяндар бар. Мұның бәрі Қазақстан бейбіт, татулық орнаған отан екенін көрсетеді.
Евгений Больгерт, Сенат депутаты:
- Бұл күннің әуелі тарихи мәні бар. Яғни өзге этнос өкілдері қазақ халқына қиын жылдарда көмек қолын созғаны үшін тағы бір рет алғыс айтуға мүмкіндік аламыз. Қазақстандағы неміс этномәдени бірлестігінің басшысы ретінде қазақ халқына деген ризашылық пейіліміз ұрпақтан-ұрпаққа беріліп келе жатқанын айтар едім. Немістерді депортациялаған қиын жылдарда қазақ халқының қамқорлығын біздің аға буын жан-тәнімен сезінді. Бұл күннің екінші мәні жанымыздағы жақындарымызға, осы елдің дамуына өз ісімен үлес қосып жүрген әрбір адал азаматқа алғыс айтуда деп ойлаймын. Биыл Жұмысшы мамандықтар жылы болып жарияланды. Сондықтан мен осы күні өндіріс пен шаруашылықта ауыр еңбекпен елдің дамуына үлес қосып жүрген жұмысшы отандастарымызға алғыс айтамын.
Акбаржон Исмаилов, ҚХА кеңесінің мүшесі, Қазақстандағы республикалық тәжік этномәдени бірлестігінің төрағасы:
- Кезінде қазақ жеріне 130-дан астам этнос өкілдері қоныс аударғанда жергілікті тұрғындар қолында барын бөлісіп, ерекше мейірім танытты. Сол мейірімнің арқасында аман қалған буынның ұрпағы бізбіз. Жалпы қазақ халқына күнде алғыс айтсақ та аздық етеді. Алғысты сөзбеy ғана емес іспен, қазақтың салт-дәстүрін, мемлекеттік тілін меңгеру арқылы білдіру керек деп есептеймін. Өз басым шетелде білім алып жүрген кезде қандай да бір іс-шара, көрме өтсе қазақтың шапанын киіп, қазақ халқының бай мәдениетін насихаттап жүрдім. Сол бағыттағы жұмысты қазір Қазақстанда жалғастырып жүрмін деп ойлаймын. Бүгін ең бірінші әке-шешеме алғыс айттым. Ал қазір бүкіл қазақ халқына тәжік этномәдени бірлестігінің атынан алғыс айтамын.
Айта кету керек, Қазақстан халқы Ассамблеясының құрылғанына 30 жыл толып отыр.
