Қазақ инженерлері әзірлеген контроллер Сербия мен Қытай зауыттарында тиімділігін дәлелдеді
МИНСК. KAZINFORM — Қазақстандық энергия үнемдеу технологиясы металлургия мен энергетикаға арналған әлемдегі ең үздік-6 «жасыл» жоба қатарына енді. Бұл туралы Үкіметтің баспасөз қызметі хабарлады.
«ИННОПРОМ.Беларусь» көрмесінде «жасыл» энергетика саласындағы жоғары әлеуетімен халықаралық деңгейде танылған қазақстандық «Electrologic» контроллері ұсынылды.
Әзірлеме жаһандық экологиялық қордың қысқа тізіміне еніп, 600 әлемдік өтінімнің ішінен іріктелген алты жобаның біріне айналды және Қазақстанға енгізуге 5,8 млн еуро көлемінде грант тарта алады.
Жоба жетекші әлемдік өндірушілердің жылдамдығынан асып түсетін, толығымен отандық әзірлемеге негізделген. Технология бастапқыда металлургияда электр доғалы пештерді басқару үшін қолданылған. Оның Сербия мен Қытайдағы зауыттарда енгізілуі балқыту уақытын екі есеге қысқартуға мүмкіндік берді, бұл электр энергиясын, шығын материалдарын айтарлықтай үнемдеуге және өнімділіктің екі есе өсуіне әкелді.
Кейінірек әзірлеушілер технологияны электр желілеріндегі шығындардың себебі болып саналатын «теріс» реактивті энергияны басқару мәселесін шешуге бейімдеді. Енді контроллерді кез-келген өнеркәсіптік зауыттарда және коммуналдық секторда энергия тиімділігін арттыру үшін пайдалануға болады, бұл оны «жасыл» экономикаға көшудің маңызды құралы етеді.
— Біз «Electrologic» контроллерін аппараттық және бағдарламалық тұрғыдан өндіріп, әзірлеушілерміз. Олар металлургия мен энергетикада қолданылады. Металлургияда біз металды балқыту уақытын қысқартамыз, электродтардың шығынын азайтамыз. Энергетикада — электр энергиясын үнемдеуге мүмкіндік береді. Біздің реттегіштер шетелдік аналогтарға қарағанда тиімдірек жұмыс істейді. Осы реттегіштерді орнатқаннан кейін, мысалы, Сербияда біз металды балқытуды 45 минуттан 26 минутқа дейін, Қытайда 120 минуттан 65 минутқа дейін қысқарттық. Бұл өнімділіктің өсуі және өзіндік құнның төмендеуінің артуы, — деп атап өтті жоба жетекшісі Жанат Жүсіпов.
Айта кетелік Қазақстанда өндірістік жабдықты интернет арқылы басқару жүйесі әзірленген еді.
